Tedim Khuapi kimah Accident a om ciang

Tedim Khuapi kimah Accident a om ciang

Tedim khuapi pen Myanmar leh India kizopna lamzikpi in nawk ahih manin khualzin mi a Kawl a Zo mi tampi in hong nawk den a, tua tawh kizui-in mawtaw accident om thei zel hi. Mawtaw accident hangin asi aliam a om ciangin ahuh thei lianlian ding thukhual phatuam ngai nasepna tampi kisam hi.

Misi buk gei ah mipi om nading inn kinaksap mahmah: Misi a om ciangin misi bukah si kikoih a, a innkuanpihte leh khuasung mi thukhual apai thei teng pen lampi dung teng peuh ah ahi thei bangin tut kul mai hi. Tutna khawlna om lo, tuilum suan theih nading takpi zong om lo, guah zu daikai phalbi vuksan nuai ah gen theih huai lua mahmah hi. Tedim khuapi lawmlawmah akhuahun zui-in mipi’ zat theih ding si buk a misi om sung a mipite’ omna ding hall neu khat loh theih loh akisam thu ahi hi.

Misi/cina puak nading mawtaw kinaksap mahmah: Accident hang hi ta leh damloh thu tawh vai phamawh a kizang lianlian thei ding Tedim khuapi ah AMBULANCE kici mawtaw kinaksap mahmah hi. Mipi’ phattuam nading minpua mawtaw a om sam hangin accident vai a nawh deihnate ah kizang thei lo zel hi. Tua ahih manin ahunbit a nai 24 akizang thei ding AMBULANCE khat pen Tedim khuapi in loh theih loh akisam thu hong ahi hi.

Puanza leh silh le ten: Accident hang a misi leh cina a om ciangin puanza kinaksap mahmah a, cina gim Kawl zuan dingte bang a zat suak theih ding uh puanza apia zo kipawlna a om ding nakthupit mahmah hi. Tulaitakin Civil Society Organization min tawh puanza leh oxygen pen ZYA President Pa Tuang Gin Mang (Gi Gin) te kiang pan puanza nei uh a, nuamtuam mahmah hi. Aliam abaite’ nading nik le puan bel kuaman kigeel zo nai lo a, kilaih pakpak nading pawlkhat kigin huai mahmah hi.

Sisan hawmkhiatna tawh nasem ding kisam: Tedim khuapi sungah sisan kisam a om ciangin sisan hawm thei mi a zong ding phatuam ngai kician om nai lo a, khat veivei Lai Siangtho sangte kiang leh Kumpi sangte kiang kipum tai pong mawk hi. Ahun lap a kizong mengmeng thei ding sisan hopna tawh nasem pawl kinak sap mahmah hi. Sisan hawmte’ thadip kik nading zong tua sisan hopna lam vaisaite in geelsak pahpah leh sisan piate adingin hoih ding hi.

Zato huang sungah nek le dawn: Tedim zatopi ah tulaitak zuat pakpak theih ding niangtuisai ahi a, nek le dawn bawl theih nading tui zatna leh anbuk kician bangmah om het lo hi. Cinate leh amau’ innkuan in nuamtak tui kicing azat theih nading, anbuk nuamtak azat theih ding uh, nek ding dawn ding nuamtak huan a, awngbuk zong nuamtak azat theih ding uh kisam mahmah hi. A limlimin zato huang sungah niangtui sai/ansai neu khat om leh kilawm ta sam hi.

Phatuam ngai Tedim khuasung mipite’ dinmun: Vaphual tawh kiciamteh Zomite pen itna leh thukhualna, cihtakna lim hi a, ahi zongin tuni ciangin atak a lahkhiatna ah mipite in hanciam ding kisam zek hi. Gtn. Mizoram ah Myanmar pan i mipihte khatpeuh a sih ciang accident maw tuikia maw siluang amuh dong uh ciahsan lo uh a, khuazang bup pasal teng inn vai lo vai nusia-in diang khengkhang uh hi. Gamgi hong tun dong hong puak uh a, hankuang, puanza tampi, sigalna, cih bangin hong vaihawmsak uh hi. Tedim khuapi sung a om mipite in accident vai a om ciangin itna leh thukhualna lamah hamciam zek lai ding kisam hi. Meltheih neite phadawm mahmah a, meltheih neilo cimawh dongtuakte panpih nasepna ah Tedim khuasung mipite in Pasian tate’ lim le mel i lah khiat toh semsem lai ding thupi ding hi.

Tedim Post