Tedim khuapi aw, Singlamteh hong phuksak Party mee piaksawm lailai nahiam?

Tedim khuapi aw, Singlamteh hong phuksak Party mee piaksawm lailai nahiam?

Tukum Kawlgam kitel nading, ahun hong nai mahmahta hi. Thu ki zakna tuamtuam I sim ciangin, kawlmi milimbia, milim mai-a, a kunkunte nangawn, tamzaw in galkap kumpi Party (USDP) Mee pialoding uh cih I zaciat hi. Tua ban-ah mualtung mi Party tuamtuamte, a tamzaw in zong, amau minam Party mah pibawltek’ uh ban-ah, I veng Falam, Khalkha te’ nangawn in amau Party CNDP, CNP etc, mah tha piatek dinguh cih thu aneu alian in I zatek hi.

Kawl galkapte pen Tedim a kiphut Singlamteh leh Tonzang, Cikha ban-ah Chin State sunga, kiphut Singlamtehte hong phuksak, hong suksiat sak uh a hihlam aneu alian in I theiciatding hi. Ahi zongin a beisa Kawl galkap ukna kipat hunlai pek a kipan tuni ciang, TEDIM Khuapi sunga, ateng mi pawlkhat leh Zomi pawlkhat te’n Kawl galkapte’n hongit mahmah uh hi, ci-in thupi asa mahmah, tha apia mahmah, a mai-et mahmah leh a mipihte ukna a, azangh, mi pawlkhat bang omle hang kilawm phial hi.

Hongit uh hileh Singlamteh hong phuksakloding uha, numei pawlkhat hong buapgawpsaklo in, mi pawlkhat hong bawlsiat saklo ding uh ban-ah, Tedim gam-ah galkap Party mah a gualzo ahih manin Tedim District ngahding zong, amau khutsung mah ah om hilel ahihteh hong naakpiak luading uh hi. Galkap kumpi ukhun a kipan tuni ciang, amai na etet uh hangin I gam ah khantohna om vetlo, kiamlam manawh den, Tedim Sang Innpi nangawn apkai kee mawk hi.

Ni danga, Aizawl sanga, a thupizaw Tedim tu-in bang ciang tungta hiam, van le lei-in kikhai hi. I veng Falam leh Khalkhate nuai-ah om thilthelta hi. A sungateng mite Christian kici vive 80% bang I hih manin naak ngaihsuthuai mahmahta hi. Thumaan agum ngamlo leh a minam a itlo, a dinpih ngamlo, a panpih ngamlo minam le gam pen cik’ mah hunin khangto ngeilo ding hi.

Leitungah gamzawng pen ah Kawlgam ki ciamteh in, Kawlgam sungah a zawng pen Chin State hi-in Chin State sungah a zawng pen Tedim gamsung Zomite tenna kuamteng ci-in kigen hi. Bang hang hiding hiam? A kuate hang hiding hiam? Rev. Thang Van Lian ai-a khat in a laigelhna khat ah, a hailua mipite in makai hoih neitheilo in zongh khangto theilo uh hi, acih pen ngaihsut huai mahmah hi.

Kei leh Tedim Khuasunga teng mite hong cihna a hikhatam maw, ci-in ka ngaihsun a, ka lunsim sungah khat le khat a ki panpihlo, gam le minam pen cik mah hunin khangto theilo ding hi, cih khat hong suak hi.

Tua ahih manin tukum kitelna ah Tedim Khuapi aw, na mipihte panpihlo in Singlamteh hong phuksak Party Mee na piakpiaklailai leh ka tenna Tedim Khuapi leh a sunga mite mi namdangte nuai-ah omlailai hen, to kaikailai uh hen, aci na hi hi. Na khantoh ding, na ut leh Singlamteh phuk Party Mee pianawnkei in Tedim Khuapi aw. Khaibawi