Tedim khuapi ah ZDF in Signboard suang ta

Tedim khuapi ah ZDF in Signboard suang ta

Dear: All Zominam, 15/November/2014 ni nitak lam 4:30 PM pan 6:00 PM dong, Zogam tulpan kaisa apuah azuun ding in To pa’n amakaih kipawlna Zomi Development Foundation (ZDF) zumpi signboard suan na kinei hi. Hih signboard suanna hunpi sung ah Tedim khua Lawibual veng hausa upa makai te, ZYA-Tedim, ZCD-Tedim le kipawlna tuamtuam pan makai tang mi te zong kihelthei hi.

Tua hun sung ah Taang Thang Nen Mung, ZDF- Secretary in hun kem hi. Pu Paul Pau, ZDF- President in ZDF a pianna thu, ZDF in seplebawl sa te pulak na le ZDF mailam kalsuan ziading te pulak behhi. Tua sung ah thupi li- (4) in kikhen thei a,tua te pen:

1) A masa pen in ZDF dialkhai a pianna thu le adeihna thu pulak hi.

2) A nihna ah “Ih Zomi te cidam na ding, Zomi akhawn khong Zato Cikha township Haiciin khua, Tonzang township Zampi khua le Tedim township Heilei khua te ah kinei hi. Hih Zato te ah ihneihsa teng gawmkhawm in paracetamol tang khat a kipan Zomi khempeuh mapang khawm a ih Zomi te ihpuah ihzuun theih na ding le mailam ah Zomi akhawn khong Zato tampi ih neih ding lunggulh na, ih Zomi buh it na le zahtaak na tawh mapangkhawm ding ZDF in kongzawn uh hi.” Mimal a hizong kipawll na tuamtuam, biakna pan a hizong ih Zomi bup cidam na ding in mapang khawmding hi hangcih zong genbeh lai hi.

3) A thumna ah “Ih Zomi gam bup a pilna sang khempeuh ah Zolai sim bu tan lang pan tan li dong a khawnkhong in ZDF pan piakding ngimna lain pi ki nei hi. Bek tham lo in, ih Zomi tangthu bu Zogam bup ah mikim in a ngahtheina ding in ZDF pan piakding ngimna ki nei hi.” Zotual lai simbu bawllzawh na ding le a hilhding sia/siamah tintan hong in Zogam bup ah a khawnkhong in hilh theihna ding ngimna zong hong pulak hi.

4) A lina ah “ Ih Zomi Zogam khantohna ding in Japan kumpi tawh thukim na omsa mah bang in Zogam bup a ding lokhawna lam thusinna (agricultural training) Thantlang le Tedim ah centre nei ding cih Kawlgam kum pi te zong tawh thukim na om samah bang in maban zop ding.” Ci thu te hong pulak hi.

A masep na tungtawn in Zogam Doctor Kham Za Khup in Haiciin khua a khawnkhong Zomi Zato ih seplehbawl leh lawhcin nate kipaak tak in hong pu lak hi. ZYA- Tedim secretary Rev. Thang Van Lian in zong ZDF matutna sa te a lungdam pihna leh mailam ah mapan khoptheih na ding thugen naleh tha piak na hong nei hi. Lawibual hausa lam pan in zong mi thum hong kihelthei in hausa pi pan thapiak na leh lungdampihna nasiatak in hongpu lak hi.

Laisiangtho tungtawn in ZBCM- Tedim zumpi pan Rev. Suan Khen Kap in ZDF thubulphuh Isaiah 30:26 tungtawn in hanthawhna le thapiak na hong nei-in thupha piakna tawh hun ki zo a, hunman khitciang in man kilaziahziah in, hun man khit teh ZDF in nitaak an vak hi. Thupulak, Taang Thang Nen Mung (ZDF- Secretary)