Tedim khua Hanmun Thak Vaai

Tedim khua Hanmun Thak Vaai

Tedim Municipal maakai te leh Tedim khua Biakna pawlpi 30 val, maakai mimal 56 te-in, mailam ah Tedim khuazaang (Khuabup) Hanmun ding, Ciimtang ah munhoih khat zatkhop ding gelna nong pulak uh tung tawnin, kei muhna leh kei ngaihsut dan tawm hong kum nuam ing. Hong langpan’ hong nial hilo in, constructive view pan a en ka hizaw hi.

Nagelna uh leh na khetsatna te uh hoihsa ing. A hizong in, ahithei khong tam? Practical lo kasakna pawlkhat hong sung nuam ing.

I. Ciimtang ih cih pen Tedim khua (PWD zum) pan, tai 8 tai 9 bang gamlaa hi. Tedim khua lutna (Kyusu ba ih) or Leitawhtan pan Tedim khua (PWD) pen tai 7 bang pha hi. A kigawm in tai 15 phal cipak maini. Leitawhtan pan gamlalua lo maw!

II. Leitawhtan ah Meigong tagah, mizawng daipam khat sileh, tua Ciimtang han ah a kivui zo diam? A misiluang Municipal te’n misi pua mawtaw tawh puaksak phial mah leh zong, sikha’ or sizui ding kua teng pai zo ding. Practical hetlo hi.

III. Sumhau, mi cithei khat si leh a’tung aa teng lungkham huailo mah hi. Ahizong in, sikha’ or sizui motaw leh mawtaw cycle zatlo phamawh a hi man’in, mawtaw 10 bang, cycle 50 bang, Leitawhtan pan Kamhau lam dung zui in, kizui ngetngat leng, khualzin gamvak, sumzuak sumlei tampi nawngkai sak ding hi. Sivui ding speed nai khat tai 30 (30mph) taithei lah omlo ding. Tawlkhat sung Tedim khua sung teng lam khak hong kul ding hi.

IV. Leitawhtan pan Ciimtang ah sivui ding zingsang tung’ mah aa ih kipat kei leh nitum maa in ih si vuizolo ding hi hang. Sivuina nikhat tangcim mah hong beipah kha ding hi.

V. Ei mite pen ih ngeina ah sigal, sikha pen kihanciam mahmah aa, kumpi nasem te bang in sivuini a khuan lak kulphial ding hi.

VI. Thu khensat na ah, RC, Muslim, Budda, Laipian teng a tuam in mun pia ding cih pen: RC pen a bang aa ii tuat na ahia?. Muslim, Budda, Laipian bel Christian lo in tuat phot leng. Methodist, Presbyterian, SDA, TCBC, ZBA, ZBCM, cih dan khenkhen hong kul toto thei awm. Practical pha kei. Christian and Non Christian ciziau leng ee’ leh! Khupkhan Thang Taithul (Norman, Oklahoma, USA. April 12, 2019