Tedim ah omlo – 1 ~ Hau Za Cin

Tedim ah omlo – 1

Tedim a nopna tampi i gen khin a, tu in a nopzawk semna ding zong tampi kibawl theilai hi cih ka muhna tawm kong gen nuam leuleu hi. Tedim ah a om tampi om a, a omlo zong na om veve hi. A omte a omlo dinga hoih zong pawlkhat om a, a omlo tampi a om dinga hoih zong na om veve hi. Khavak nuaia Thangmual lam pan a suk len vanleng ging dudute bel a gin ngaihlua kei in ahi zongin khuapi etlawmsak, a khu a nusiatte zong et dingin etlawm mahmah hi. Nidang ciang Zomi te tuanna dinga a lengleng uh ahih hangin tu laitak a kito etet zong hiphot mai hi.

Thukizakna Laidal Hawm Omlo: Khuapi khat dingin nisim thukizakna a om ding tawh kibang napi na omlo bilbel hi. Lamka ah ka zin ciang zingsang simin Zolai tawh kigelh Thukizakna Lai (Newspaper) i thawhma in inn kongbiangah na kikoihsak a, zing nisuak nilum awi kawm, niangtui dawn kawm in kisim a, leitung mun tuamtuam ah tua bang thu piang hi, Lamka khuasung leh khua kim ah tua bang thu piang hi cih kigelh hi. Tua bang a om ding ka sak leh Tedim ah na omlo in, nilum awi kawma niangtui dawn bek na hi ziau in, a kimlo khat om hileh kilawm cih bangin kihi hiauhuau. Ni 4 ka taam sungin Thukizakna lah kisimlo, radio lah kingai lo, TV lah kienlo, internet lah kienlo… ka lawmte in gamdangah tua ni 4 sungin thu tampi na theih behlap ding uh a, thuthak tampi na zak behlap ding uh a maw ciin ka lung hong nuam mello hi. Leitung thu piang theilo in khuasung, tualsung thupiang thei kei leng upate in ‘bil vuh loh’ a cih uh kibang baih mahmah leh kilawm. I khangual kiban lah diak leh kilawm sa ing. Nau min khawng puak damdam in i phuak hang i thutheih, i thuzak nisim, naisim, hun sim in i behlap kei a, ei bualna teng bek ah i bualbual leh i theihloh lam zong a theilo thei ding kihi mawk hi. Mite in a theih lam uh zong a theilo ding kihi lai hi. Tua ahih manin Thukizakna laidal kihawm omlo pen nuam kei. Om leh nuamzaw in um ing.

Cope Topa om laiin Tedim Thukizakna na hawm a, tua banga kihawm bangzah a om tam ka thei kei hi. Biakinn kimin zong ei pawl sunga thupiang teng, khuasunga thupiang theih dinga kilawmte, gampua a thupiang theih dinga kilawmte gelha nipini sim a hawm dingin hoih kasa hi. Ko, Mizogam khawngah khuasung pawlpi khempeuh, khangno kipawlna, numei kipawlna cihte in a kinei khin hi in Nipini zingsang bang thukizakna laidal sim ding tam zawzen hi.

Vasa omlo: Khual i zin ciang khua tuamtuam ah i pai a khuasung ah vasa khawng na ham ciauciau leh a nop dan tuam se hi. Khuasung singkung tung khawngah vasa na bawm henla, tua khawng en kawm, a ham khawng uh za kawmkawm leng a nuam mahmah khat hi. Ahi zongin tu tung pen Phuitong a pak nawnloh man maw, ahih kei leh theikha leh suangzute a pak loh laitak ahih man maw, khuasung ah vasa ka mu kei hi. Khua kim ah zong vasa leng zaizai cih bang ka mu kei mawk hi. Khuasung ah singkung a kisuanlo hi peuhmahlo napi vasa ham ciauciau khawng kiza lo a, vasa leng diamdiam khawng kimulo cih pen bang hang ahi tam aw ciin ka ngaihsun hi. Naupangte muh ding, hoihsak ding vasa tawm khat bek khuasung ah a om theihna dingin bangci vaihawm theih ding hiam? I Zomi vaphual zong khuasung khawngah hong leng dada phial mai leh phamawh se hiam?

Singkung Gol Omlo: Khua mual pan ka khuadak a, khuasung pan ka khuadak a, a gal mual, a pam mual, a khang mualte ka et kawikawi hangin singkung gam mang hoihtak ka mu het kei hi. Tedim leh a kim a mualte kolh dekdek in kiak them cikcik po lai sama, a po sunsun zong kihal tum hileh kilawm takin lohal sulnung bangin mangvom leh leivom ka galmuh hi. Koi ah i singkung po teng om mang khin hiam? Koi ah i gammang tulak teng vatmai khin, banga zang khin ihi hiam? I gam i kep kei leh i gamsung bekhauzacin in thuaklo dinga nang leh kei in huih siangtho a kicing takin ngah kei leng natna kibehlap dinga, i cidamna thahatna zong kiam ding hi. I khantolo tuam dinga, i thatang zong a hat ding zah in hatlo ding hi. I nek ding singkung lopa pan anteh meh lim nono tampi kingah thei hi, tuate om kei leh sumbuk pan saphuklai tawh a kitunsa meh leh sathau te i tam nek dinga, tuate in hong ‘khek’ sak mahmah dinga ‘manta kungah i kah thei’ pah ding hi. Tua ahih manin kim leh pam, gamsung puah ding, kep ding Zomi khempeuh tavuan, mawhpuak, sep ding, pello a sepding khat ahi hi. Khuapi sung pan khuanawl gam Km 2 tan ciang bang singkung kuamah in phuk phalloh cih bangin kham theih hileh maw; mipi in zong tua bang deih hang ciin gen theih a om tam ci ing e.

(zop lai ding)

Hau Za Cin
Phuitong Liim
http://www.hauzacin.blogspot.com/