Tate pattah ziading ~ Rev. Ngem Khawm Niang

Tate pattah ziading ~ Rev. Ngem Khawm Niang

Mi pawlkhat in tate pattah, hilh, tai kulkei, amau pianzia in hong om lel ding hi. A kihilhhilh tate zong a sia tam mahmah a, a kihilh hetlo tate pawlkhat zong hoih mahmah lel hi ci uhhi. Kihilh, ki pantah a, a pil theilo leh hilh le genloh pi a ahoih bel ommah in tamlo hi. A sia veve ding khat zong hilhloh a asiat sa’ng; hilh a asiat lungkimhuai zaw hi.

Hilh napi-a hongman kei teitei leh Nulepa mawhna tawmzaw hi. Laisiangtho in hilh ding, taai ding, pattah ding leh sat ding mah Nulepa vaipuak hongsuan hi. Hilh-a a sia sangin hilhlo-a asia tamzaw a, hilhloh a hoih sangin, hilh a hoihmah lungkim huaizaw hi. Tua man in –

• 1. Pau a sinphet mah in thunget sinsak pah in.
• 2. Laisiangtho kamngah zong sinsak in.
• 3. Nisim a omdan ding geelsak in. (Thawh hun, kipuah hun, thunget hun, laisim, nasep, kisil, kimawl hun, sangkah hun….etc)
• 4. Na tate lawm bangin ki kholhpih in.
• 5. Sat leh taai akul ciang bek in zang in.
• 6. Tate Jesu neihsak tum tentan in.
• 7. Pau a sin teh gamtat leh kampau kilawm sinsak in.
• 8. Tate it tuam, deihsak tuam nei kei-in.
• 9. Nadang sangin tate kepna thupi sak zaw in.
• 10. Hunpia hamtang in.
• 11. A deih khempeuh uh leisak pah pah kei-in.
• 12. Kampau hoihlo azat ciang taai-in.
• 13. A neutung pan thuhilh kipan pah in.
• 14. Van azatte amahmah koihsak kik in.
• 15. Laibu aut peuhpeuh simsak kei-in.
• 16. Lai simlo pi lai a on leh a hang kan in.
• 17. Na tate muh in Nupa kitawng kei un.
• 18. Sum thalawhsak in, sum haksatna telsak in.
• 19. A duh bangbang pia pahpah kei-in.
• 20. A sia te’n ahoihlohna honggen leh hilh pah in.
• 21. Kikholhpih gilo aneih ding khaam in.
• 22. Nasep kisinsak khin in.
• 23. A ma a lopi, nathak khat hong ken teh dong tel in.
• 24. A ma ading na sepsak te theisak in.
• 25. Innsungah aw sang zangsak kei-in.
• 26. Nipisang leh leitung sang gensia ngei kei-in.
• 27. Khua sungah sawtpipi vaksak kei-in.
• 28. Mundang a utna peuhah sawmgiak sak kei-in.
• 29. Na Pasal/Zi hoihlohna na tate zak in gen kei-in.
• 30. Na tate zak in a Sia te leh Pastor te gensia kei-in.
• 31. Inn sungah milim ginalo te suang kei-in.
• 32. A kilawm lo kizepna, a uanglua kipuah dingin hanthawn kei-in.
• 33. A mailam thu dinguh hilhkhol den in.
• 34. Mi tawh a kitot leh mawhsak zaw inla, ahang kan in!

Zan-in tho themthum inla, Pasian tungah kiko in. Na tate in Hehpihna angah na dingin na lungsim khempeuh pia in. Kongzing khempeuh ah naupang te puksi khin dektak uhhi. (Kahla 2:19)

Nipisang ii a deihna nam (5) te:

1. Naupangte in Jesuh Khrih nei-in Pasian tawh a kithuah theihna dingun a nuntakna uh bawlpha ding

2. Naupangte in nuntak hoih tawh a khantoh theihna ding leh midang te a it theihna ding

3. Laisiangtho’ deihna bangin a khantohtheih na dinguh leh mipicing a suah theihna ding

4. Pawlpi mi muanhuai suak in a khantoh theihna ding

5. Amau pumpi mahmah kikem kiuk siangtho-in khantohna man/dik a neih theih na ding;

Nipisang Makai Siate neih ding thu te:

Pawlpi lam ah;

• (1) Maitai ding,
• (2) Kammal hoih pau ding,
• (3) Ciamnuih siangtho zang ding,
• (4) Thu a hoihlam in mu thei ding,
• (5) Midangte khual thei ding,
• (6) Kipuah siangtho hamtang ding, (maiphiat, puan siangtho)

Lungsim ngaihsutna lam ah;

• (1) Thumaan ding,
• (2) Deidan tuam neilo ding,
• (3) Cihtakna leh hanciamna nei ding,
• (4) Lungsim siangtho nei ding,
• (5) Muhkholhna (vision) leh geelkholh siamna nei ding,

Kha lam ah;

• (1) Pianthakna diktak kician nei mi, kipiakzawhna anei mi hi ding,
• (2) Pasian hongit mah bangin naupang te itna leh veina nei ding,
• (3) Khamangthang veina nei mi hi ding, Jesuh in Kalvary Singlamteh tungah sihna tawh hong tatkhiatna-ah naupang te a kihel ahihna asang mi hiding,
• (4) Naupangte nuntakna a khelzo ding Pasian in vangliatna nei hi cih amuang ngam mi hi ding,
• (5) Thunget hahkatmi leh Laisiangtho sim hahkat mi hi ding,
• (6) Thanuam ding, Naupang te ki tangsapna muhpih thei ding,

Nipisang Siate (Makai te) theih ding:

1. Kam tawh hilhna sangin, gamtatna in thu tamgen zaw hi.

2. Topa Jesuh Honpa-a asang (piangthak)mite bek in midang te lampi maan hilh thei hi.

3. Naupang te sangin thuthei zaw dinga, a thusinte ban-ah naupang te dotna dawngthei dingin theihna hau mi hi ding hi. (sinbeh kanbeh ding)

4. Laisiangtho thu thei mahmah dinga, Laisiangtho genna bangin a gamta mi hiding hi.

5. Pasian bek in naupangte pilna pia thei hi cih phawk in Pasian theihna lam ah mipil a suahsakna dingin hanciam ding hi.

6. Naupangte thalawpna leh lunglutna lam theihsawm dinga, amau tawh kituak in hilh ding hi.

7. Thutheihna ding bek in hilhlo dinga, a lungsim ngaihsutna uh a zattheih na dinguh hilh ding hi. Thusinna-ah a lunglut theihna dingun makaih ding hi.

8. Nipisang makai/sia te pen a thanuam, kimawl a uuk mi, naupang te tawh a kikhawl thei mi hiding hi. Awsiang nei, maitai thei, mi hehpih thei, kamtam lo, a ki niamkhiat mi leh midang te ahuhnuam mi hiding a, Pasian a muangzo mi hi ding hi.

9. Naupang te teltheih pahpah dingin kammal zang dinga, khua sung kihona kammal te mah zang ding hi.

10. Naupang te in bangzah thei uhhiam?cih lam hilo-in a kihilh thu te bangzah thei uh hiam cih kan tawntung dinghi.

Nipisang te Kumcin Awging tungtawn in ih theihtheihsa leh ih zuihzuih sa hi ta mah leh ih phawkkik zel ding deihna in ka sangkahna pan hong kihilh te hong hawmsawn kik ingh. Rev. Ngem Khawm Niang (Ciimnuai Christian Fellowship – Hakha)