Tahum gospel khaici a vawh, zuauthei syate in amau’ thuhilhna ah lungdampih in khut a beng lote, Amen a pia lote, a thuhilhna uh zanuam loin biakinn sung pan a paikhiate tahum (or ansi)te ci zaw lai uh hi. A taktak in cilehang tahumte’ thuhilhna sungah a nin nuam lo taangte paikhiat ding mah hizaw a, taangte’ thuhilhna sungah tahum a om leh bel seepkhiat zawh ding kisam hi.
Taang le tahum thu genkakna ah gup ngah leh gup ngah lo a gen kakna hi khin a, tahumte pianthak nading kigen nawn loin haltum ding bek kigen hi. Lai Siangtho ih sim ciangin taang le tahum, antak le ansi om khawm lai hi cih thu na kigen hi (Mathai 13: 24-30). Ahi zongin pawlpi tampi takte pen hih Lai Siangtho’ gen bangin om nawn lo uh hi. LST’ gen daan hileh pawlpi sungah taang tamzawin tahum a tawmzaw ding hi. Antaktamzaw in ansi a tawmzaw ding hi. Tuhun pawlpi tampitakte sungah taang sangin tahum tamzaw a, antak sangin ansi tamzaw hi.
Antak lakah ansi om hi cih ding pen LST’ deihna hi a, himah taleh antak lakah ansi om hi cih ding sangin ansi lakah antak om cih dinmun ah a tung pawlpi tampi ki-om ta hi. Taang lakah tahum cih ding pen LST’ gen hi a, himah taleh taang lakah tahum om hi cihna panin tahum lakah a taang pawlkhat om lai tei uh cih ding dinmun ah kitung lawmlawm hi.
Pawlkhat in LST’ gen taang le tahum om khawm lai hi cih thu bulphuhin, thuhilhkhialhna khawng, thuhilhkhial sya neih khak ding khawng, upna maan pianthakna maan nei lo pawlpi mi va neih khak ding khawng a phamawh lua in ngaihsun lo uh hi. Taang le tahum a cih mah bangin pawlpi khat sung zong sandaan kibang lo, updaan kibang lo, ngaihsut daan kibang loteng mah a ki-om khawm lai hi lel ci ziau uh hi. A taktak in cilehang hih LST mun in taang lakah tahum a om ding a deih hi lo hi. A deih ahih loh hangin taang lakah tahum om a hihna thu a gen hi beka, taang le tahum pokhawm banga a nin le a siang a kibang a nuntak gawp ding a deihna hi lo hi.
Pawlpi khat cih pen upna le zuihna a kibang sitset ding hizaw hi. Updaan saandaan kibang lo pen Khrih in Pawlpi khat a cihte hi lo dinga, kipawlna khat peuh bang bek ding hi. Taangle tahum pen a pawlpi mite sungah updaan saandaan a kibang sak zolo upa makai syate ii bulphuh nadingin a kigelh LST mun hi lo hi. Updaan saandaan kibangte’ lakah tahum om cih thu hi bek hi. Tua eite’ laka tahum tawh thukim khawm ding a cihna hi lo hi.
Taang in ama’ taan ding bangin taan sawm loin, tahum a ngawhngawh leh tahum in hong deep dinga, tua pen tahum gospel hong suak ding hi. Pasian in a pawlpi pen khatvei leh tahum gospel khatvei leh taang gospel dingin deih ngiat lo hi. Taang le tahum thu pen upna doctrine le dinmun kician ih neih zawh loh manin paulap a zat nading hi lai zang lo hi. (azom omlai)
Evan. Suangh Dal
Comment piaknop aomleh...