Syria gamah Rebels te’n Barrel Bomb leh Thau tawh innkuan khat kaplum

Syria gamah Rebels te’n Barrel Bomb leh Thau tawh innkuan khat kaplum

Nov. 20, 2016: Tu zingsangin Syria gam-a rebels ten Aleppo nisuahna lam barrel bomb leh thau zangin nasia takin kap uh a, barrel bomb in Sakhour district a teng al-Baytounji’ inn kha in, a innkuanpihte mi guk in sihna tuak a, tua barrel bomb ah sih theihna huihsia chlorine gas kici kikhih in naksam in si uh hi ci-in siavuan mi nih in gen hi. Rebelste thau kap in sanginn khat kha a, sangnaupang giat in sihna tuak hi ci-in gen beh uh hi.

Rebelste mulkimhuai takin a gamtat ciang nangawn in suhum tawm in a hum nuam-a a gum leh Syria kumpi leh Russiate gamtatna gensia in ui ham bangin a ham den keei a, Syria kumpi leh Russia in human rights palsat hi ci-in nitumna gamte tawh lapawl a sa khawm den Syrian Observatory for Human Rights (SOHR) in bel siavuante gel in a genna um loin bomb bel hi mah a, ahih hangin chlorine gas a kizat leh kizat loh kitel lo hi ci hi.

SOHR in bel Syria kumpi in gas zang hi ci-in ngawh a, Syria kumpi in bel hih thu thal nial a, gas zat pen international Chemical Weapons Convention palsatna hi a, kumpi khat buangin a gam mite tungah zang ngei lo ding hi ci hi.

SOHR in rebels ten sanginn a kapna uh pen al-Farqan district sunga om Saria Hasoun sanginn hi a, naupang giat site pen kum 8-12 kikal mi a, picing tawh a kigawm mi 10 si hi ci-in gen hi. Syria kumpi in Aleppo nisuahna lamah rebelste sukcimit ding hanciam in kikaptuahna nasia mahmah a, Pithai (Tuesday) panin tu dong mi za tampi in sihna tuak ta a, rebels ten khua sung mite tai khiat ding phal lo uh a, a tai khia nuam a lungphona neite nangawn kaplum ta uh hi. Numei, naupang meimawl leh teeksia teng mah in hih tualgal thuak lah pen uh hi. Al Jazeera/ Thang Khan Lian