Syria galkapte leh apawl te’n Aleppo 85% lata

Syria galkapte leh apawl te’n Aleppo 85% lata

Dec. 10, 2016: Syriate gal vanleng ten Aleppo ah rebelste ukna tung lam panin nasia takin kap zom zel uh a, Russia in kumpi lehdo galkap (opposition fighters) khempeuh in Aleppo a nusiat khit siang mateng kikhawl lo ding hi ci hi. Syria galkap ten lei lam panin rebelste ukna Aleppo nisuahna lam a nawkna uh nipi kal thum cing ta a, tu-in Aleppo 85% la zo ta uh a, rebelste ukna lak khitna ding su beuh cia bang om lai hi. Upmawh sangin gualzawhna kimanglang ngah to zel hi ci-in Syrian military source in Reuters news agencyte kiangah ci hi.

Rebels ten Aleppo khahsuah le uh Syria tualgal sungin a guallelhna lian pen uh hi lai ding hi. Syria buai kipat 2011 a kipanin mi 400,000 val in sihna tuak khin ta hi. A beisa ni nih sungin Aleppo panin galtai mi 50,000 Aleppo panin Russia in kihekkhiasak (evacuated) ta a, tu ni bekin mi 20,000 kipua khia in, gamnuaimi (militants) 1,217 in a thau uh koih khia in kipiakhia uh hi ci-in Russian Defense Ministry spokesman Maj. Gen. Igor Konashenkov in ci hi.

Rebelste ukna Aleppo nisuahna lam panin mi tul sawm tampi tai khia ta a, ahih hangin rebels ten pawl khat a tai ding uh dal a, mi za tampi mah mang hi ci-in zan in United Nations in gen hi.

Syrian Observatory for Human Rights (SOHR) in zan in rebelste ukna tung lam panin sawm val vei kikap a, thaupi (artillery fire) kikap ziahziah den lai hi ci hi. AFP news agency correspondent khat in Aleppo nisuahna lamah sumbuk nei ten sumbuk hong ngam lo uh ahih manin nek ding muh ding hamsa mahmah hi ci hi.

Bomb kinak khiat lua ahih manin si luangte a la ngam ding om lo ahih manin galtai ten khua lakah si luang muh ding tam mahmah hi ci uh hi ci-in gen beh hi. Tung lam panin nasia takin a kikap banah Syria galkapte leh galdo dinga kipiakhia Syria galkapte tawh kipawl militias kici ten lei lam panin nawk uh ahih manin Aleppo khuapi thauvui nam veng vung in, Aleppo kiim-a districtte ah meikhu muh ding nasia mahmah hi ci-in gen thuah lai hi.

Syrian special army unit sunga volunteer group kicite lak-a Tiger Force-te commander in Aleppo kulh (citadel) kiim-a om lampi kawcikna Bab al-Hadeed ah rebels ten galvan hoih nak zak mahmah in, a galdote uh a siam ban uh-ah sniper rifles nak zat mahmah ahih manun galkap liamna leh sihna tuak kitam mahmah hi ci.

More: Malaysia OUG Plaza ah damiah lut, RM1 Million manneiding gukhia

Inn kikapsia leh inn khangkham lak pan khawngin ong kaplum in kihemmang ziau uh a, baang ah laimal “Sinipers om hi kidawm un. Assad kipaai khia/kia hen” cih peuh ki-at hi ci-in gen beh hi. Rebelste a khauh mahmah hangun nipi kal tam lo sungin a ukna teng uh kila zo dingin ka lamen hi ci hi. Source: News Agencies and Sputnik/ Thang Khan Lian