Spain ah bawngtal tawh akimawl khat akhe leh agawlgui kipikkha gawp

Spain ah bawngtal tawh akimawl khat akhe leh agawlgui kipikkha gawp

Spain gamsung ah bawngtal tawh kimawlna Bullfight khatah pasal khat bawngtal in pikkhagawp in liamgawp cih Reuters pan kiza hi. Spain, Madrid khuapisung aom bawngtal tawh kimawlna aminthang mahmah munkhat ahi “Las Ventas Bullring” ah Sunday ni in thupiang ahihi.

Tuabang in bawngtal tawh akimawl tepen “bawngtal thatdingpa” Matador kici a, hih kimawlna ah aliampazong Spanish Matador khat ahihi. Bawngtal in akhe leh agawlgui ah akitawh pikkha in liamgawp ahih manin Surgery kibawl cihi.

Tuapa minpen Daniel Garcia Navarrete hi a, agihna 460kg apha bawngtal khattawh akimawl laitak in akhe pikkha masa in lei ah tuksukpah hi. Amahzong lei ah atukkhit ciangin amai akhut tawh kidalpah himahleh bawngtal in agawlgui panin pikkha veve hi.

Las Ventas Officials te’n agenna ah agawlgui ah apikkhakna 15cm bang thuksuk a, akhe ah apikkhakna zong 10cm bang thuk cihi.

Bawngtal in apeigawp laitak in adang Matadors te ahonding in tungpah bilbel uh a, Daniel Garcia Navarrete pen silosam hi. Hih bawngtal kimawlna ah pawi en bekbek pen mi 10,000 valbang pha kici hi.

Pawi en sungpanin khatpa ii genna ah Matador papen a gawlgui leh akhe ah sisan tawh kidim zihziah cihi. Bawngtal in kimawlna limneu khatbangin peigawp cihi.

Video etnopleh: Madrid, il torero Daniel Garcia Navarrete viene trafitto al collo dal toro

Daniel Garcia Navarrete pen Southern Spain aom Jaen City pan ahihi. Aliamgawp khitciangin zato ah amanlang in kipuakpah a, Sunday ni mahin Surgery kibawlpah hi.

Bawngtal tawh kimawlna “Bullfighting” pen Spain te ii ngeina kimawlna khat hi a, tangtawng pekpan in azat uh ahihi. Lauhuai mahmah himahleh tudongmah muhnop kisa in Popular mahmahden hi.

Ahi zongin Animal Rights Movement te’n hih bawngtal tawh kimawlna, bawngtal thahlupna pen diksa hetlo in, langpan mahmah uhhi. Spanish Local Authorities pawlkhat inzong hihbang kimawlna pen zatnawnloh dingin hanciam mahmah uh cih kiza hi.

More: Ataw pan bawngtal ki letmat 11 thukin pikkha himahleh lungkianai tuanlo

Nungdiak inzong Mexico gamsung Bullfighting khatah pasal khat bawngtal in ataw panin akitawh pikkha in atawkuam teng kikekgawp cih kiza hi. ZD Sawltak #zomidaily