South Sudan in UN Peacekeepers 4000 kikoihding deihlo

South Sudan in UN Peacekeepers 4000 kikoihding deihlo

Jan. 13, 2017: South Sudan in a gam uh-ah kilemna omsak dingin United Nations peacekeepers 4,000 kikoihna ding a thukim sa hi napi-in tu-in South Sudan gamah kilemna omna ding mainawt zel hi ci-in a kikoihna ding deih loin nolh kik hi.

Hih UN peacekeepers 4,000te kikoih dingte pen regional protection force kici ding hi ci-in ci-in August 2016 in UN Security Council in a thukimna a neih hi a, South Sudan khuapi Juba-a UN peacekeeping mission galkap 13,500 omte huh dinga kisawl beh sawm ahi hi.

“South Sudan kumpi in hih UN galkap protection force kicite kisap beh nawn lo a, kumpi in mipite lakah kilemna a om theihna dinga galkap kisamte kipia zo hi,” ci-in South Sudan Foreign Ministry spokesperson Mawien Makol Ariik in nilaini in ci hi. South Sudan kumpi in hih UN galkapte kikoih behna dingin November kha-in thukimna a kineih hangin tua pen kizuk kik hi ci-in gen beh hi.

Defence Minister Kuol Manyang Juuk in mi tampi ten Juba leh a kiim ah kidona om lai hi cih ngaihsutna neih hangun Juba khuapi ah muanna leh bitna om ta a, regional protection forces kici galkap kisam nawn lo hi ci hi.

President Salva Kiir’ minamte Dinka kicite leh a deputy president lui Riek Machar’ minamte kikal ah kihuatna hangin December 2013 in tualgal na piang a, mi tul sawm val a sih banah million nih valin teenna ding kician nei lo uh hi.

More: Malaysia akithat Kawlgammi 5 te vaitawh muanmawh mi 15 kimanta

Kumpi kipumkhatna dingin “unity government” kici April kha-in a kibawlkhiat hangin July kha in tualgal piang kik a, Riek Machar South Sudan panin galtai hi. Source: News agencies/ Thang Khan Lian