1951 Refugee Convention pen South East Asia kipawlna sungpan gam thum bekin thukimpih uh a, tua thumte lakah gam khat bek in min na gelh mawk ahih manin Gambelmi leh Galtaai te aa dingin a kumkum in lungmuanna hong niam khiat suk tektek ta hi. Galtaai leh gambelmi a kiciahsak kik banah gam pawlkhat ah kumpi Upadi mahmah in zong gambel galtaai te gupna thu khauhpai saklo bek thamlo in tuipi leh tawnte aa dingin zong lampi ong hamsa sak mahmah ta hi.Tua kawmkalah tuipi tawn a pai galtaai mite a tamzaw in gunkuang nengneng cihte zangh uh ahihman in tuipi tungah tampi takin sih lawh uh hi.
Hih thute hangin UNHCR te nasep ding akibehlap hong suak hi. Galtaai gambelmi lah kibehlap semsem, a tamzaw in khuapi sungte ah phualsaat uh ahih manin gammi thuneite in Refugee hihna theihpih nuamlo uh a, gamsung lutsim danin ngaihsun in mattheih matmawh manin thong sung camp sung denna ziahziah lel uh hi. Tua khit ciangin tua bang a mi amatte uh gampua ah pawlkhat nilkhia in pawlkhatte amau gam tekah ciahsak kik uh hi. A matlohte zong gamsung thukhun mahmah in gumlo photphot ahih manin sum zong thalawh theilo uh a, sangkah theilo banah cidamna lamah zong niam mahmah uh hi. Rakhine gam sung buaina hangin zong kawlgam sungah inn leh lo neilo tampi tak a om banah gamdang ah tuipi lam tawn a taaikhia tam semsem hi. Tua te gamdang alut ding uh ciangin gammite in a kilawm lo zah ciang dongin a meltheihte tung pan un sum leh paai nangen lai uh hi.
UNHCR in galtaai mite khualna in a belhna uh gammi thuneite tawh mapang khawm in huhna panpihna piak ding geelna nei uh hi. Tua tawh ki zui-in galtaaite nasep theihna ding a kipan UN min khumna leh a ciahkik nuamte ciah kik sak ding maw gam thumna dong mainawt suak sak ding cihte khempeuh dongin ngiimna leh vaihawmna nei uh hi. Ngimna leh sepkhiatna te a tangzai semsem theihna dingin 
UNHCR in South East Asian Nations (ASEAN) tawh a kizopna omsa zomto suak ding hi.
Theihsa mah bangin Malaysia kumpi pen 1951 Refugee Convention ah na kihel lo hi. Tua ahih manin gambel galtaai mi peuhmah phalna omlo a gamsung lutsim in kingaihsun ahih manin nuntaak hamsa mahmah hi. UNHCR in gambel galtaai te thu mah kumpi sungah na gengen lai ding a, tawmvei sung ompakna ahih hangin lungmuang taka om theihna ding leh Labour Migration Scheme tawh ki zui-in galtaai gambelmi te’n zong na a sep theihna ding un hanciampih toto lai ding hi.
2015 kum sung aa zat ding Budget pen USD 157 Million kia hi. Hih sum teng ei South East Asia huam sunga UNHCR te zat ding sum ahi hi. Tua teng lakpan Kawlgam in a lemlawh khak ding pen USD 67,772,726 hi. Source : www.unhcr.org ZAM iNFO
Comment piaknop aomleh...