Singlamteh tunga Jesus thugen ~ Pau Tun Thang

Singlamteh tunga Jesus thugen ~ Pau Tun Thang

Kum 2000 val paisa-a Jerusalem khuanawl a mi mawh pen banga kikhai Nazareth tangval Jesu sihni khristian te adingin mangngilh theih hi lo hi.Leitung piancil pana mihingte muh ngei loh Pasian itna hong lak hi.Singlamteh tunga-a sih ding ciangin kampau hi.Tua kammal te cikmah ciang mang ngei nawn lo ding hi.

Hih leitunga hun a zat sungin mihingte’ lungsimah kumpi gam hong phut hi.Pilat in ‘Juda kumpi pa na hi hiam?’ cih a dotna Jesu in,”Keima’ gam in leitung gam ahi kei hi.Keima’ gam in leitung gam hileh,Judah mite’ khutsung ka tun loh na ding ka mite in a do ding uh hi.Tu in ka gam in hih laitakah a om kei hi a ci hi. (John 18:36)cia-a hilhcian hangin Pilat leh a galkap te in thei siam lo uh hi.Judah ten a thuhilhna pen Moses dan kalh hi ci-in thah ding dan bek ngaihsut mawk uh hi.

Rome kumpi thahaatna zangin man in Kalvary mualtungah that uh hi.Tua lai ah Jesu in leitung mite ading kam hong pau khia hi.Singlamteh tung pan Jesu in Pa aw,amau in bang ahih uh cih thei lo ahih uh ciangin amau mawhna na mai sak in”(Lk 23:34) ci-in amah a khelbawlte mawhna maisak hi. Amah a bawlsia gaalte itna leh mawhmaisakna tawh thuk hi.Tua in mite’ lungsim zo ahihmanin mite lungsimah a kumpi gam hong piang hi. Tua mawh maisakna hangin amah a bawlsia leh a nungzuite nangawn kisik in thu-um hong kibehlap hi.

Leitung dan te tawh kilehbulh in “Ke’n kong cih ah vantungah a om na pa uh Pasian’ tate na suah na ding un na gaalte na it un. Hong bawlsia te ading thu na ngetsak un(Mt 5:44)ci zaw hi.Mihingte kitangsap kilemna leh muanna pen itna leh mawh maisakna tawh namcih kiangah tungsak nuam hi.Tua kumpi gamah micih kikhentuamna om lo hi.Kisik a -amah a zuante tungah lungdam zaw hi. A taklama kikhai mithatpa kiangah Jesu in “Ken a man takpi kongcih in ah, tuni in nangmah in kei tawh Paradis ah na omkhawm ding hi”(Lk 23:43) ci-in a sih dektak mah mah ciang nangawnin vantung kawngkhak hawnsak hi.

Ama’ gam lut nangin zekai luat om lo hi.Tu ma in mi mawh mi khial nahi phial zongin na kisika, amah na zuat naak leh hong sangzo lua hi.Bang hang hiam cih leh tua ding mah-a leitungah hong pai ahi hi. ‘Mi hoihte tankhia dinga hong pai ka hi kei a,mi mawhte tankhia dinga hong pai ka hi zaw hi ‘cih thu Galile gama-a pulaak zel pen a sih dong in a takin kilangsak hi.

Singlamteh nuaiah a it anu Mary leh a nungzuipa a muh ciangin ,”Numei aw nangin na tapa en in”(John 19:26)a ci hi. A nungzuipa kiangah, “Nang na nu en in!” (John 19:27)ci-in singlamteh tung pan amah a zuite innkuan khat suaksak hi. A nungzui leh thu-um khempeuh adingin anu Mary piakhia hi.Leitunga hun a zat sungin kilem taka om ding tam veipi gen hi. Ka thupiakna ahihleh, keimah in no kong it mah bangin note khat leh khat na ki it un”(John 15:12) ci hi.Innkuan ki it diam diam dingin thuhilh zel hi.A sih khit ciangin zong thu-um masate, innkuan mah bangin na kithutuak uh hi.

Haksatna lianpi a thuak ciang singlamteh tung pan in”Tui ka duh hi” (John 19:28) ci-in awng hi.Tui duh dangtaak bek hi lo in, lei mihingte it ding deih a dangtaak zong ahi hi.A thuak haksatna khempeuh mihingte hang hi mahleh tua pen thei siam lo uh ahihmanin dangtakin awng hi. A nungzui pawlkhat banah na lamdang a bawl laia zuite in taisan hi.Khasiat huai takin singlamteh tungah a it leitungmi te adingin hong thuak hi. ‘Eloi Eloi, lama sabakthani?/ Ka pasian, ka pasian aw, bang dingin kei hong taisan na hi hiam? (Mk 15:34) ci-in hong paukhia tang hial hi.A thuakna te gim huai lua ahihmanin vana Pa nangawn in taisan in ngaihsun a, hehneem ding ngai hi.

Nai thum sung singlamteh tungah gimna a thuak khit ciang, “Pa aw, ka kha nangma’ khut sungah kong aap hi” (Lk 23:46) ci-in naakpi in a kiko hi. Tua khitciang “A zo zo hi”'(John 19:30) ci-in a lu kun a, si hi. Tua laiah lei mihingte tat khiat nanga –a nasep ding khempeuh zo siang hi.A itna thupi tak Kalvari mualdawn ah hong ki bua khia hi.A pang panin sisan leh tui hong luangkhia hi.

Tua tatkhiatna tui a dawn khempeuhte in tawntung nuntakna ngah thei ta hi. Tua tatkhiatna tui a telsiam leh a dawn kha mihingte mi hampha ahi uh hi. Tu dong –amah a thei nuam lo leh a nung-ngatsan te bel nisima singlamteh tungah amah a khai behlapte ahi uh hi. Singlamteh tung pana-a kammal te ngaihsutna ah nisim thak suak saka, cihtakna tawh ama’ nung zuih den ding pen mimal kim i mawhpuakna hi.

Jesu Khris eite’ adingin hong kipiak khiat mah bangin eite zong ama’ adingin iki piak kuul hi.Eite ading a si Jesu adingin iki piak khiat ngam kuul hi.Jesu etteh a midangte adingin nuntakna piak khiat ngam kuul hi veh aw!Emil Mettler kici London khuapi a niangtui zuakna nei khat om hi.Mi hau ahihna sangin mi cingh(kiphal) ahihna hangin miten theizaw hi.Mi kiphal mah mah khat hi takpi mah hi. A niangtui zuakna –a khawl khempeuh neek leh dawn ding pia zel hi.Himahleh a man(bill) ngen ngei khollo hi.

Pasian nasepna tawh kisaia huhna sumdawn khatpeuh a om ciang guak kik sak ngeilo hi.Sum tampi tawh ciahkik sak zel hi. Khatvei Emil in a sumbawm a hawn laitak Missionary khat sumkhawn in hong pai hi. Sumbawm kihawng a sum kawmkalah siktukilh sau khat mu hi. Lamdangsa ahihmanin tua missionary in,”Tua bang ding ci na hiam?” ci-in dong pah hi.Emil in siktukilh inches 6 a sau tawikhia in, ”Hotdam ka hih theih nangin Jesu in a man(cost) a piak tamzia ka theih det nang leh ama adinga ka kipiak theih nangin hih siktukilh ka sumbawmah ka koih hi” ci-in dawng hi.

Hong tung ding Good Friday hunah Jesu hong itna leh mihingte adinga hong kipiakna te phawk thak ni.Aman a nuntakna hong pia hi, nang Jesu bang na pia ding hiam? (Good Friday Phawkna) Pau Tun Thang