Singlamteh ka et ciangin ~ Dr. Ngul Khan Pau

Singlamteh ka et ciangin ~ Dr. Ngul Khan Pau

GENHENNA: Mawhna hangin tawntung meilipi sung na tunloh nadingin Pasian in a tapa Jesu Khris hong sawl hi.

GETHSEMANE: Olive gahte a kigawina mun, a tuisuk-khiatna mun ah, mawh neilo Pasian tapa in nang adingin ama nuntakna pia dingin khensatna nei a, Singlamteh a tun’ma-in hih mun panin na gualzo khin zo hi.

GABBATHA: Pilate galkapte in Jesu a khelbawlna mun hi. Tuni dongin hih mun muh theih et theih lai hi. Rom galkapte suangpek tungah kimawlna mun hi. Topa in vei 40 tang ding savun zang kua tawh kibawl tungah sik leh saguh kikilh tawh a satna mun uh hi. Mi pawlkhat a sat uh ciangin a vun bek pailet hi loin a sa mahmah zong eu-khia hi. Sisan luan ziahziahna mun hi.

GOLGOTHA: Greek pau in “Topos Kranion” Hebru in “Golgotha,” Roman pau in “Calvary” luguh mun kici hi. Lugun mun a kicihna hangin luguh tampi tua munah a om man hi dingin kingaihsun a, tua ciangin a mual mahmah zong a galkhat panin i et leh luguh tawh kibang ahih man zong hi thei hi. Hih mualtungah nang adingin na mawhna Topa in na sihpih hi.

SINGLAMTEH KA ET CIANGIN: Singlamteh ka et ciangin thu thum ka mu hi. Khatna, ka mawhna ka mu hi. Mawhna neilo Pasian tapa a mawh penpen bangin a kibawlna mun hi. Si kibua loin mawhmaina om lo ahih manin ka mawhna khempeuh adingin a sihna mun hi.

Nihna, Pasian itna ka mu hi. Pasian in hong itna na muh theih dingin tua singkhuampi tungah hong lak hi. Singlamteh na muh simin Pasian in kong it hi, hong cihna hi.

Thumna, ka mawhna maisakna ka mu hi. Tua a tak ngelhngelh sisan in ka mawhna khempeuh hong sawpsak hi. A tapa Jesu Khris sisanin i mawhna khempeuh panin hong sawpsiang hi (I John 1:7).

Billy Graham leh a seppihte khatvei hih mualtungah na kahto ngei uh hi. Tua mual panin a kumsuk uh ciangin a lawmte khat in, “Billy, hua mualtunga i om lai-in bang na ngaihsun hiam?” ci hi. Ama’n, “Kum 2000 a phadektak lai-in mawhna nei lo vet lo Pasian tapa in Billy Graham mawhna pua a, a sihpih ka ngaihsun hi,” ci hi. Nang mawhna zong pua in sihpih ahih manin, na up leh mawhmaina na ngah ding hi. Topa in thupha hong pia hen. Dr. Ngul Khan Pau