Singkung thongkia cihbang naza ngeihiam?

Singkung thongkia cihbang naza ngeihiam?

Singkung thongkia, singkung matleh hen tuak cihbang naza ngeihiam? Pakistan gamsung aom Mawngkung (Banyan Tree) khat kolbulh khaukhih tuakmawk hi. Atung a Photo pen kolbulh khaukhih atuak Mawngkung hi a, akungtung ahzong “I am under arrest” cih thulu tawh lai kisuangmawk hi.

Hih Mawngkung pen Pakistan, Landi Kotal kici khuasung ah aom hi a, athupiang pen 1898 kum pekpan ahihi.

1898 kum in hih Landi Kotal kici kuamteng ah British Army Officer khat om a, tuapa minpen James Squid kici hi. Hih Officer pa pen khatvei nitakkhat zukhamlua mahmah in aom laitak hih Mawngkung pen aomna munpan in kikhin kawikawi, ama omnalam manawh in paipai cihbang in zukhamsul in ngaihsun hi. Amahzong ahehsuak mahmah ahih manin Mess Sergeant khat thupia a, hih Mawngkung mancipsak hi. Sergeant pa inzong apu thupiak ommah bangin hih Mawngkung pen mancippah a, sikkhau, sikkual tawh hencip bikbek hi.

Hih Mawngkung pen akimatzawh kum 100 bang valkhin himah taleh tudong kolbulh khaukhihsa mahin ki koihkoihlai cimawk hi.

Tuahunlai in British Army tepen kilau mahmah a, amau ii gamtatna khatpeuh khuasung mite alangpang aomleh amauzong lehthuakthei cih ahih manin, kuamah in hih Mawngkung pen sikkhau sutkhialo in tudong aki koihsuaksuak hihtuak hi.

“I AM UNDER ARREST”
ONE EVENING A BRITISH OFFICER,
HEAVILY DRUNK THOUGHT THAT I WAS
MOVING FROM MY ORGINAL LOCATION
AND ORDERED MESS SERGEANT TO ARREST
ME. SINCE THEN I AM UNDER ARREST.

Hih Mawngkung tungah atung abang in lai kisuang a, akung asihdong, apukdong mat atuakding hihtuak mawk hi. Cimphawng, thukhel nono 🙂 ZD Sawltak #zomidaily