Singapore meileng Station sungah muanmawhhuai van kimu ahih manin kikhakcip

Singapore meileng Station sungah muanmawhhuai van kimu ahih manin kikhakcip

Singapore gamsung Woodleigh MRT meileng Station ah tuni Tuesday ni in muanmawhhuai van “Suspicious Substance” kimu ahih manin nai 3 sung kikhakcip cih CNA pan kiza hi.

Singapore Police te’n nitaklam 4:24pm hunin Facebook tungtawn in Update abawlna ah tua muanmawhhuai vanpen thunei te’n sitcianna abawl uh ciangin mohbawlna in akizang “Baking Flour” nahi ci’n pulakkhia uhhi.

Social Media tungtawn in MRT Station ah muanmawhhuai van kimu cih Singapore Police Force (SPF) te atheih uhciangin aphual ah delhpah uh a, Singapore Civil Defence Force (SCDF) te’nzong aphual mahah delhpah uhhi. SCDF panin nasem pawlkhat in “Protective Clothing” tawh kituamcip uh a, meileng Station ah lut uhhi.

Assistant station manager Mailyn B Carriaga in agenkhiatna ah meileng Station sung munli munnga khawngah White Powder kimu kawikawi ahih manin ki lunghimawh cihi. Meileng Station sungah innphiat Cleaner asem khatin amuh masak cihi. Tuapan in muanmawhhuai kisa ahih manin Singapore Police te aki zaksak cihi.

Nungdiak mahmah inzong Singapore gamsung atai MRT Station khatah muanmawhhuai vankhat kinusia ahih manin, meileng Station tawlkhat ki khakcip hi. Hougang MRT station akicihna ah hi a, tua anusia pasal kum 39 aphakhin khatzong kimanpah hi.

Zanni inzong Malaysia gamsung Wisma Bernama ah Bomb dingin aki ummawh vankhat kimu ahih manin ki patau man mahmah hi. Hihbangin ki lauthawng sakna tepen athu taktak akitheih ciangin lauhuai hetlo leltak ahih manin ki ciamnuihbawl ziauthei hi.

More: Singapore meileng Station khatah muanmawh vankhat kimu in ki patau

Ahi zongin aki ummawh danin lauhuai van hoihlo, apuakkhamthei hiamvan khatpeuh hileh nuihzak huai hetlozel khading a, nuihna sangin kahna tamzaw khathei dinghi. ZD Sawltak #zomidaily