Singapore ah innteeng nasemding a painuam Kawlgam numeite tawlkhat sung Work Permits kipialo photding

Singapore ah innteeng nasemding a painuam Kawlgam numeite tawlkhat sung Work Permits kipialo photding

Singapore ah innteeng nasem a-om Kawlgam numeite zawhthawh thutawh
kisimmawh, kibawlsia, kimeetdawh gawpna huhau-in Kawlgam kumpi in
numeite Singapore paitheih nading tawlkhat sung khaktan photding hi
cihthu Zangkong (Yangon) nasep zonsak lam kipawlna khat in Saturday
(September 13, 2014) ni-in pulak khia hi.

Kawlgam pan gamdang nasep zonsaklam vaisai kipawlna ahi (Myanmar
Overseas Employment Agencies Federation) panin makai nihna asem Pu Soe
Myint Aung in, “Singapore ah innteeng nasem Kawlgam numeite zawhthawh
thutawh kisimmawh, kibawlsia cihthu hong kiko hi. Tua ahih manin tua
nasemte hoihtak huut/kepcing nading kadeihsak uh hi. Tuatawh kizui-in
Kawlgam nasep silbawlna lam thunei (Labour Ministry) in Singapore gam
a thunei vaisaite tawh kitel siamna thumung khat suaikai theih masiah
numeite Permit khaktan sak photding hi,” ci-in AFP te’ tung pulak hi.
Ahi hangin Pu Soe Myint Aung in tua Permit khaktanna pen banghun a
kipan cih gencianlo a, Singapore tawh suaikai dingvai kikupna pen tuma
khakhat kimpawl in kipan hi cihbek genkhia hi.

Singapore gamah laibunei leh aguk om akigawm innteeng nasem Kawlgam
numei vekpi 30,000 kimbang omdingin kingahsun hi. Singapore ah
innteeng nasemte’ dinmun pen suksia mahmah hi cih Migration lam akan
mipilte in genkhol ngei uh hi.

Source: Bangkok Post | September 14, 2014 |

Zam Sian Sum