Siavuanpa’ kipiakkhiatna

Siavuanpa’ kipiakkhiatna

Cina phamawh khat at (surgery) dingin phone pan sapna ngah ahih manin Siavuanpipa zong zatopi sung ah nawhsa takin hong lut in a puante hong khek semsem in cina atna khan (OT) lam ah paipah hi.

Cinapa’ Pa zong Siavuanpa a muh phet in amaipan khak in “Bang hangin hizahta in zekai na hiam?? Ka tapa i natna nasia mahmah ahihlam theilo na hi hiam? Siavuan khat i vaipuak leh thucin (ethic) te bek na thei mah na?” ci’n hehsuak sa in hamkhat hong suah hi.

Siavuanpa in a nuihmai kawm sa-in “Zato ah a baihsa in omlo kahih manin hong thum ingh. Tun zong a manlang thei pen aa hong pai hi ingh. Tua ahih manin na lung na dai sak in. Ka sepding te va sem dih ning e” ci in paisan hi.

“Bang ka ci e? lung nuam sak ding e? Nang tapa khat hileh e na lung a nop zo dia? Na tapa tulaitak in a si bang hi leh bang na ci zen tam aw?” ci’n cinapa’ Pa in heh kawmsa in dawngkik hi.

Siavuan pa’n zong nuihmai kawmsa mah in “Sihna cih pen kua mah in zozo tuan kei e. Pasian kiang ah na tapa aa ding thunget sak in. Ken kasep ding va sem dih ning ei” c’n damkang tak in hong dawngkik hi.

Cina a at khit ciangin Siavuanpa OT panin hong pusuak khia in “Na tapa a nunna ding patauh huai nawn kei ei. At nate zong Pasian thupha tawh hoih ei” ci’n kipak takin hong gen hi. Tua khit ciangin cinapa’ Pa i kampau te ngaihsak mannawn lo in a manlangin pusuak khia pah hi.

“Bang dingin cinate tung ah hizahta in kiphasak zen a hiam? Aman in cileng ka tapa pianzia te hih sang a kicing zaw in hong gen ding a kilawm aive” ci’n a gei aa om nurse khat kiang va gen hi.

Nurse nu in zong dahna maipuak tawh “Nang theikha lo maw… Siavuanpipa tapa zani aa motor kibung ah a site lak ah kihel aive. Tuni sihvui ni ding hi in na tapa a phamawh at ding kisam ahih manin phone tawh a kisam aive” cih san hi.

Mikim in hamsatna khat ciat ki nei hi. Tua hi aa bang hang, bang dinmun ah ahi zong na lungsim dai sak in kampau kidop ding kisam hi. Lailet: Muvanlai Source: the doctor service by unknown author