Sialsawm Pawi: Khangluite zatzia ~ J. Thang Lian Pau

Sialsawm Pawi: Khangluite zatzia ~ J. Thang Lian Pau

Zomite in thupi taka i ngaihsut pawi nam nih – Khuado leh Sialsawm i nei hi. Sialsawm pen lo pawi khit, Dopi (April) kha-in a kibawl hi a, lo nasep vai hampi teng zawh aihna, Pasian kianga ann leh khai hauhna ding leh khuahun hoihna ding ngetna pawi ahi hi. Sialsawm cih kammal khiatna pen ‘Sial zaha a lian ngiimna’ cihna hi, a ci om hi. Sial zaha a lian ann leh khai neih theihna dinga khuasiam biakna pawi, cihna hih tuak pen hi.

Zingsang tuungin sii kisawh zotang taaksih leh zu thawlno khat tawiin hanah dai kihawh a, a sisate phawkna leh thupha kibawl hi. Zing tuung mahin siampipa in Zotang annhang tawh khua sung cidamna ding leh hauhna ding aisan-in mailam ading thupha ngetna bawl hi. Naupang ten pute zu kholh in, pu ten a tute cidamna ding leh mapaina dingin tamphuah (thupha pia) uh hi. Sunkim ciangin tangvalte a sawm ciat uah kikhawmin ngawk sat uh hi.

Ngawk sat ciangin nau-gual nihin tangval khat buan uh hi. Nau-gual ten a lelh leh tu kum kizawng ding, ci-in kiciamteh hi. A kibuan ma-un Sawm upate in ngawk to masa uh a, “Dawi dawi, ngawk ngawk e, lui vo!” ci-in thum vei a to khit uh ciangin kibuan thei pan uh hi. Sialsawm ciangin unau pata teng ahi zongin, a sawmsawmin ahi zongin gan go-in ann nekkhopna kibawl hi. Papi khangham ten naupangte tungah Zo ngeina, khang tangthu leh i ki-it i kingaihna ding thu tuamtuam hilh uh hi.

Khua mial ciangin a Sawm ciat uah tangvalte kikaikhawmin, la awih leh lam tawh gualnuamin om uh hi. Mi a kim uh ciangin lawm-ann (lawmngaihte ann) siim dingin vakkhia uh hi. Hih hang hi ding hi, Siamsawm pen pawlkhat in ‘Lawm Ann Neek’ a cih uh. Nungakte innah a lawmngaihnu’ nu ahihkeileh a naunu in tangvalte neek ding zu leh sa lui uh a, a gaih valte sawmah ciahpih hamtang uh hi.

Lawm ngaipa bel bangmah pia lo uh a, innka kiu khatah tu tuamsak uh hi. Tangval dang teng a ciah khit ciangin, nungaknu in innka kiu-a a om a lawmngaihpa zu leh sa tawh va zuan thei pan a, amau adingin tua zan nanana pen ‘Valentine’s Day’ hi bel mai hi. Sialsawm ciangin lawm kingai a omleh, lawmngainu adingin papi ten zu leh sa a limzaw deuh koih tuamsak ciatciat hi. J. Thang Lian Pau | April 17, 2010