Shanghai khuasung ah mawtaw pailaikhat meikuanggawp, mi tampi nawkkha in 18 liam

Shanghai khuasung ah mawtaw pailaikhat meikuanggawp, mi tampi nawkkha in 18 liam

Shanghai khuapisung Starbucks Coffee saimai ah Van mawtaw khat meikuanggawp in, khetawh apai mipite phulkhagawp ahih manin mi 18 liam cih AFP pan kiza hi. Khetawh khuasung mivak atam mahmahna, Central Shanghai ah tuni Friday in thupiang hi a, aliamte lakah mi 3 tepen gimngawh phadiak uhhi.

Tuaban ah zingsang khuasung mipite nasemding in akuan ngeingai laitak, 9am hunpawl in Shanghai City khualaizang Peoples’ Park tengah thupiang ahih manin, mi tampi anawkkha ahihi.

Shanghai Police te’n Statement akhahkhiatna ah tua Van mawtaw ahawlpa pen kum 40 gualpawl aphakhin pasalkhat ci uh a, mawtaw ahawlkawm in zatep cihi. Mawtaw sungah apuakkhamthei “dangerous substances” puakawm in, a zatep in tuate apuakkhamsak, mei akuang hidinghi ci’n palik te’n genkhia uhhi.

Tua geina Building akizom khatah Security Guard asemkhat ahi Zhang Sai kici in agenna ah tua Van mawtaw pen asungah meikuanggawp in, tuaciangin Driver inzong hoihtak Control theinawnlo in, khetawh apai khuasung mipite nawkpheigawp cihi.

Video: 18 hurt as burning van slams into crowd in Shanghai

Van mawtaw pen mei akuangawp khitciangin, khetawh painading in akibawl Sidewalk ah apai mipite anawkpheikha cihi.

Social Media tuamtuam ah Photo leh Video Clip aki khahkhiate sungah Van mawtaw mei akuan laitak, mawtaw in Starbucks Coffee saimai aom dai ataihna, singkungnuai mai ah akhawlna, Firefighter te leh Police te abuai mahmah laitak cihte ki khahkhia hi.

Hih mawtaw nawkna hangin Starbucks Coffee saizong ki khakcipphot a, tuageiteng ki siansuah in Police pawlkhatzong kimuthei hi.

More: Shanghai khuapi geinai ah tembaw nih kitaih, mi 32 mangcip

2013 kumsung inzong Beijing City ii khuasung a etlawmsak Iconic Building pikhat ahi Tiananmen Square maiah mawtaw khatin gamdangmi Tourist 2 taihlum in, tuakhit ciangin meikuang ziahziah hi. Sawltak #zomidaily