Shan State sungah Landmine puakkham in numei 1 si, adang mi 2 liam

Shan State sungah Landmine puakkham in numei 1 si, adang mi 2 liam

Myanmar, Shan State sungah numei khatin leisung akiphum Landmine sikkha in puakkham cih Irrawaddy pan kiza hi. Tua asikkha numeinu pen sipah a, adangzong mi 2 liamhi ci’n Local NGO te’n genkhia uhhi. (Photo: Aliam te lakah Lahtaw Seng Mai pen tangek tawh akithuahlai hi a, Lashio Township sung aom zato khatah alup laitak)

Shan State, Kutkai Township sungah Tuesday ni in thupiang hi a, gamsung ah pateh “Mushroom” zongdingin apailaitak un leisung ah akiphum Landmine asikkha ahihi.

Asi numeinu pen amin Lashi Kaw Nan kici a, kum 43 aphakhin khat ahihi. Tua asi numeinu ii apasal U La Doi kici leh adang alawmte Lahtaw Seng Mai kici mi 2 tezong Landmine apuakkhap ciangin liam uh ahih manin Lashio Township sung aom Public Hospital khatah kipuak uhhi ci’n NeT Organization panin Tawm Mai kici in genkhia hi.

NeT Organization akici tepen gamsung aom Landmine te alauhuaizia leh theihding thute agen kawikawi kipawlna khat ahihi.

Hih atuahsia tepen akigawm in mi 5 apha uh hi a, gamsung ah pateh peuh zongin akivak uh ahihi. Tua atuahsiatna munpen 2011 kumpek akipan kikapna apian zelzelna Tarmoenye Town tawh kinai hi. Asi numeinu pen amaipenpen ah apai hi a, Landmine asikkhak ciangin puakkham in, akhezong alangnih in kitan cihi.

Asi nupinu Lashi Kaw Nan leh U La Doi te nupa in ta 4 nei uh a, gamsung ah pateh zongin akivak uh ahihi. Tulaitak in U La Doi pen zato ah kikem in, innkuansung sumzong ahi anu si in, apa zato ah lumlai ahih manin, atapa a upapen tan 10 akah laitak himahleh sangkhawl kulding cihi.

U La Doi leh aliam adangkhat ahi Lahtaw Seng Mai tepen akhe uh aliam hi a, Landmine apuakkham ciangin athemnen te akhe sungah lutkha ahih manin Surgery bawlkul hamtangding cisawnsawn hi.

Myanmar gamsung ah abeisa kumsung in Landmine apuakkham bekbekpen 119 veibang om a, asi bekbekpen mi 52 takin sihlawh uhhi. Asi tuazah banah aliam bekbekzong mi 124 phahi ci’n UK-based NGO khat ahi Halo Trust te’n genkhia uhhi.

Landmine 119 vei apuakkham lakah 45 veipen Shan State sungah apuakkham hi a, mi 22 si in, aliam bekbekpen mi 54 tak phahi.

More: Tatmadaw te’n Karen State sungah aphum uh Landmines teng hemkhiading

Tukum January panin May kha kikal Myanmar gamsung ah Landmine apuakkham pen 127 veitak hikhinta hi. Tuahangin asipen mi 23 phakhin a, aliam bekbekpen mi 136 phakhinta hi. Tukumsung apuakkham lakah 49 veipen Shan State sungpanmah hi a, asi pen mi 9 hi in, aliam pen mi 49 ahihi.

January pan May kha kikal Kachin State sungah Landmine apuakkham pen 65 vei omkhin a, tuabangin apuakkhapna hangin mi 8 in sihlawh in, adangzong mi 76 bangin liamlawh uhhi. Shan State leh Kachin State sungah Ethnic Group thautawi te leh Myanmar Military te kikapna kinawhzak mahmah hi. Tua Landmine tepen Ethnic Armed Group leh Myanmar Military te khatlekhat ki ngawhtuak uh a, tua Landmine tampitak khuasung mipite sungpan gamsung gamvak te’n sikkha pahpah uhhi. Abeisa in Tatmadaw (Myanmar Military) te’n amauphumsa Landmine teng ka hemkhiading uh ci’n pulak ngei uhhi. Sawltak #zomidaily