Shah Alam sung aom Suai zuakna abuluh guta te’n bangmah guzolo in ciahkhiakik

Shah Alam sung aom Suai zuakna abuluh guta te’n bangmah guzolo in ciahkhiakik

Malaysia, Shah Alam vengsung aom kham (suai) vanmanpha kizuakna Jewellery Shop khat guta damiah te’n aluhlaitak CCTV panin Video Record kibawlkha in, Social Media ah ki thehzak hi. Migilo guta tepen mi 6 hi uh a, Motorcycle lukhu khetek in amai uh kiselbawl uhhi.

Shah Alam, Section 23 vengsung aom Jewellery Shop sungah nung Monday nitaklam 6:28pm hunpawl in alut uh hi a, guta damiah te’n sekpi tawh suai akikoihna Showcases (Display counters) te satzangawp uhhi.

Ahi zongin tua Display counters te ah akithuah maan tepen thautang zong adalzo “bullet-proof” Glass hi in, a khauhmahmah hi a, kitamsuak zolo ahih manin bangmah gukhia zolo uh cihi.

Guta te lakah khatpa in thauneu khatzong tawi kici a, ahi zongin kuamah kapkhak neilo uhhi. Showcase te khauhlua, duailua in satkham zolo uh ahih manin, suai leh vanmanpha te agukzawhloh uhciangin lungkia in ciahkhia uh cihi.

Guta damiah mi 6 tepen Motorcycle 3 tawh hi uh a, gukzawhh aneihloh uhciangin Motorcycle tawh taikhiakik vingveng uhhi.

Tua Jewellery Shop te’n Facebook tungah agenkhiatna ah guta damiah te’n bangmah gukzawh neilo uh cihi. Ahi zongin asuksiat uh saisung vansia teng aman akituat ciangin RM80,000 bang manneiding ci uhhi.

More: Kuala Lumpur khuasung aom vanmanpha zuakna Jewellery Shop ah suntangpi in damiah lut

Police te’n Jewellery Shop sungah guta damiah te gamtatna te encian in, khutma Fingerprints pawlkhat zong lathei uh a, guta te kankhiading uh cih kiza hi. Hih suaikhi, khamkhi khawng akizuakna abuluh theizel migilo damiah guta tepen laumel neihetlo uh a, suntangpi mahinzong Shopping Mall sungkhawng ah lutgawpngam mawk uhhi. Ahi zongin migilo guta damiah tezong tuahphaden khollo hi 🙂 Sawltak #zomidaily