Malaysia, Shah Alam vengsung aom inntung khatpan numeikhat kia in si

Malaysia, Shah Alam vengsung aom inntung khatpan numeikhat kia in si

Malaysia, Shah Alam vengsung aom Apartment Building khat ii inndawl 17th Floor panin numeikhat kiasuk in sipah cih Berita Harian pan kiza hi. Shah Alam, Seksyen 16 vengsung ah zanni Sunday ni in thupiang ahihi.

Tua Apartment Building sungmah ah aom mi pawlkhat te’n hih numeinu ii aluanghawm pen Sunday sunlam 1:37pm hunpawl in amuhkhak uhciangin, amanlang in kumpi thunei te zasakpah uhhi.

Shah Alam vengsung ah palik thunei ahi Shah Alam police chief Assistant Commissioner Shafien Mamat in agenna ah hih numeinu inndawl 17th Floor panin kiasuk in si cih hongki zaksak ciangin aphual ah kadelhpah uh cihi.

Aphual ah katun uhciangin tua numeinu ii aluanghawm pen kamupah uh a, ahi zongin apumpi tungah kuacih theihcian nadingin ID (Identification Documents) bangmah omlo cihi.

Police te’n hih numeinu ii sihna pen hoihtak velcianna aneih uhciangin bangmah ki bawlsiatna, kisuamna cihte omlo ahih manin hih sihna pen tuahsiat sihvatna “sudden death” hi ci’n ciamteh uhhi.

Ahi zongin tua numeinu ii aluanghawm pen Tengku Ampuan Rahimah Hospital ah kipuak in, Postmortem kibawlding cihzong kiza hi.

More: Inntungpan guaktang in akiasuk Model pen aki sawnkhia hiding ci

Shah Alam Police thunei te’n hih numeinu sihna vaitawh kisai in ameltheih tanau te aki kansan laitak hi. Khuasung mipi sungpanin hih numeinu tawh kisai in atheikha na om uhleh amanlang in hong zasak un ci’n genkhia uhhi. Sawltak #zomidaily