Inndawl 123 apha Lotte World Tower (Seoul City) dawnah pasalkhat akhutguak tawh simkahtoh in kiman

Inndawl 123 apha Lotte World Tower (Seoul City) dawnah pasalkhat akhutguak tawh simkahtoh in kiman

South Korea gamsung Seoul City sung aom inndawl 123 Storey apha Lotte World Tower ah pasalkhat apuanlam panin akahtoh laitak kimankhia cih AFP pan kiza hi. Tuapa pen innsangdawnpipi akahsim zelzel, France gammi Alain Robert akicipa ahihi.

Seoul City sung aom Lotte World Tower pen inndawl 123 Storey apha hi a, leitungbup innsangpenpen kiciaptehna lakah asangpen 5 na (world’s fifth-tallest building) ahihi.

Tua Lotte World Tower dawnah tuni Wednesday ni in Building ii apualam panin Alain Robert akahto hi a, adawndong akahtohsawm himahleh alangval akhenkhit ciangin Security te’n khawlsak in mansuak uhhi.

Alain Robert pen kum 55 aphakhin hi a, “French Spiderman” ci’n aminthang, innsangdawnpipi ah akhutguak tawh akahsim theizel French Urban Freeclimber ci’n aki ciamtehkhat ahihi.

Tuni inzong Lotte World Tower dawnah bangmah Safety vanzat neihlo, khauzang cihzong zanglo in akhutguak in akahto ahihi. Tua Lotte World Tower dawnah kahtoh cih akitheih ciangin asunglam panin nasemte’n khawlsaknuam uh a, zuikawikawi uhhi.

Alain Robert in Media te tungah agenkhiatna ah Lotte World Tower inndawl 75 Storey kakahtoh khitciangin Building nasemte’n hong khawlsaksawm uh a, zusa leh zawhngeu bangdan in kaki delhkawikawi uhhi. Ahi zongin anunung ah amau khutsungah kaki apkhia hi ci’n genkhia hi.

Building Maintenance akibawlna luai “cradle” sungah kituangsak in, inndawn ah ki kahtoh suakpih a, tuakhit ciangin thunei te’n mansuak uhhi.

Hihbangin Lotte World Tower innsangdawn ah akahtohna ahangpen South Korea leh North Korea gamnih te aki lemkiktheihna muakna in hihbangin akahto kahihi. Kumpi thunei te’n hong theisiamding in ka lamen hi ci’n genkhia hi.

Video: French urban freeclimber Alain Robert attempted to scale the world’s fifth-tallest building Wednesday, getting more than half way up the 123-storey Lotte World Tower in Seoul before security forced him to abandon the ascent. The 55-year-old, dubbed the ‘French Spiderman’, made his way up the building bare-handed and without ropes as staff pursued him from inside.

Liausum tampi hongki gaamthei khading hi, ahi zongin South Korea leh North Korea gamnih te ii Peace-making lungdampihna in hihbangin agamta kahihi ci’n genbeh hi. Hihpen gamnih makai ahi Kim Jong Un leh Moon Jae-in te tungah lungdam kakohna hi cisawnsawn hi.

Alain Robert pen abeisa inzong Building innsangpipi 100 valbang ah bangmah Safety Equipment zangvetlo, midangte panpihna zong ngenvetlo in akahzo zelzelkhat ahihi. Tuabangin agamtatna hangin Guinness World Records te’nzong kuamah panpihlo in Building innsang tampi akahkhin penpen “most buildings climbed unassisted” ci’n pahtawina apiakliang uhzong ahihi.

Tuabangin akahtohna Building innsangpi tepen leitung ah aminthang “world’s tallest skyscrapers” ci’n Iconic Building in akiciamteh tampitak kihel hi. Tuate lakah Eiffel Tower, Sydney Opera House, Petronas Twin Towers leh Dubai khuapisung aom Burj Khalifa cihtezong kihel hi.

More: China ah innsangdawn Stunt kimawlmawl khat 62 Storey pan kia in si

Alain Robert pen abeisa inzong gamtuamtuam ah Building sangpipi te phalna omlo in, amathu tawh kahsim zelzel ahih manin tamveipi zong mat athuak zelzelkhat ahihi. Seoul City sung aom Lotte World Tower panin thunei te’nzong agenkhiatna ah hihbangin phalna omlopi in akahtoh pen lauhuai mahmah hi ci’n genkhia uhhi. Sawltak #zomidaily