Sen gamgidung ah singgu gamdangmi 102 kiman

Kawlgam kumpi thunei te’n Sen leh Kawlgam gamgidung ah phalna omlopi in sing agusim Foreigner mi 102 leh Kawlgam mi 20 mankhia uh cih Tuesday ni in Myanmar Defense Ministry in pulakkhia hi.

Ni 3 sung Kawlgam galkap te’n Operation abawl uh hi a, mi amatban ah Logging Truck 436, Pickup Truck 14 leh adang khamtheih guihtheih tuamtuam zong mankhia uh hi.

Hih amatkhiat mite ii amin apuam pen kumpi thunei te’n pulak khiatna neinailo a, ahi zongin amatkhiatna munpen Kachin State sung aom Myanmar – Chinese Border cihciang genkhia uhhi.

Hibang in gamgi dungah singtom in aomte pen Kachin Independence Army in phalna apiak uh hihtuak a, thukimna laidal zong nei uhhi. Ahi zongin Kawlgam galkap te’n KIA te phalna piakpen dik salo uh a, amatsak veve uh ahihi.

Kawlgam ah khuahun sialua, singkung beimangta (Deforestation) ahih manin Kawlgam pan gampualam ah sing zuaknawnloh dingin nungkum April khasung in kumpi thunei te’n tangko khin uh cihzong kiza hi.

Zogam sung ahzong singkung lopa keu mahmahta ahih manin, Deforestation nasia mahmah a, lungkhamhuai mahmah hi. ZD Sawltak