Scottish Independence from the United Kingdom

Scottish Independence from the United Kingdom

Tuma Kum 300 val (1707) lai aa, United Kingdom of Great Britain and Ireland sung ah a kigawm khawm Scotland gam pen tu-in, a gammipi te’n United Kingdom pan suakta/kikhen kik (independence) ding maw? cih, zingciang (Thursday- 18/09/2014) in Vote piakna tawh lakkhia ding uh a hihi.

UK-gam pen leitung ah nitum ngeihlohna gam a hih ngeina uh, a piicing gam leh the UN Charters and Universal Declaration of Human rights (the right of peoples to Self-determination) sung-ah kamciampia gam khat a hihna uh tawh kizui in, sisan naisan luankul lo, mipi-mimal kim-in, Suahtaakna Deih/Deihlo (Yes/No) kuih ziauna tawh, thu a khensat ziau lel ding uh hita hi.

Scotland-gam pen kum1603 ciangciang, a mau leh amau a ki-uk gam a hizong in , King James 1 of Scotland pen King James VI of England hong suah nung, Acts of Union(1707) ci-in Parliament thukimna tawh, kumpi khat, parliament khat nuai ah, a hong kigawm uh a hi uh hi. Christian gam hi aa, Holy Bible (King James Version) a kici zong King James khutnuai ah, a kiletkhia Laisiangtho a na hihi.

England leh Wales-gam tawh tuikulh neu khat tung ah teeng khawm gamneu khat hi aa, tu nangawn inzong, mi Awn 5 (5.2 millions) bangbek a hih uh hang, tembaw-lamna(Ship building) la kipan sikvan lian golpi te kibawlkhiatna mun, tuilam tawh khualzin gamvak te totmahmah na mun’ khat na hi aa, gamsung sumpiang zong gaihzawh loh dong zah in om ki ci hi. Television, Golf kimawlna cih te, Scottish te’ patkhiat kici hi. Tuabek hilo, tuhun-in zong, UK-gam te galvan lian (Nuclear submarine, warship) te kibawlna leh a ki-kepna munzong a na hihi.

England Kumpinu Queen Elizabeth II khutnuai ah om a hih uh hang in, a mau aituam in zong Scottish Parliament (Holyrood) tawh kalsuan uh hi aa, ki-ukna tampi’ a maumah in len leh khensat thei a hi uh hi. Gentehna in, UK gamsung om veve, Scotland-gam sang naupang te’n sangsap piakha lo se zen hi. Mimal in cileng zong, Ex-UK Prime Minister Gordon Brown, Ex-Chancellor Alistar Darling cih bang gam makai-milian pipite zong Scotland gammi na hi uh hi.

UK sung ah innteek tang tualtel in, leitung ah a thahaat a minthang, gamnuamsa himah taleh, banghang tu phingphing’ kum 300 khit ciang kikhen nuam se uh hiam? cih ngaihsut na leh thusunna tampi mah a om kawmkal lai ah, Suahtaakna lading/lalo ding tawh a hong buai mahmah uh hi.

Tu laitak, Scottish mipi te sung ah zong, Suahtaakna deih(Yes, ei leh ei mah ki-uk, kivaan ding) a ci leh, UK gamsung mah ah kipawlleng mailam ding hizaw(Better Together) a ci, a langtuak bang pha uh aa, vom leh kaang ding kuama’n genkhol theilo phot hi. A hizong gam makai te’ leh a lunghimawh deuh te’n ‘Bangbang a piang zong Scotland/Scottish mah ih hi aa, kitelsiam ding thupi hi’ ci-in a ki hanthawn, tha kipia uh hi.

Aih leh, Zosuan pawlkhat te lenna UK gamsung a om, Scotland-gam mipi a tam zaw te’n bang ngaihsun taktak uh hiam? cih’ hong paiding Friday ni (19/09/2014) ngak dih ni.

Nantal’suan