Sawtpi A Tuang Khawm Ding Lah Hi Lo Hanga!
Ka omna St. Louis, MO ah a beisa kum tam simsim lai-a thu piang ngei khat kong gen nuam hi. Nungak khat a nasepna pan bus tuangin innlam zuanin nitak khat hong ciah hi.
Inn a tun ciangin a nu leh a pa leh a naupa tawh, innkuan mihing li pha uh hi leh kilawm, nitak ankuang um khawm liiliai uh hi. Tua nu in,
“Tu nitak kong ciah lam ka bus tuan bel genthei tak ing ei” a cih leh, a nu-in,
“Bangci-in maw? Bang hong tuak kha na hia?” ci-in dong hi.
“Lampi 55 (55th Street) pan bus kong mat a leh a sawt lo a nupi khat hong kah to-in ka gei ah hong tu. a mi lah gol lua mahmah, thau lua mahmah, van lah hau lua mahmah lai. Ka tutna vuah kita zo pha lo, a taw phel lang pen kei tung ah hong kinga hi mai! A ang ah van tampi tawi kawm netnat lai, laikuang khat bang ka mai ah hong dawkto den aih cianga ka mitlimlang hong nawkkhiatsak dinga kithawi denkeii, ka kidopdopna-in nak gim ing ei. Ka awn-awnna, ka dawidawina-in ka ci ka sateng golh ngiingeii ei” ci hi.
A naupa in, “Nang tua nu kiang ah, ‘Ka tung ah hong tu cei, na taw na khin o, na ang-a na tawi vante in zong hong sukha ei” ci pah lo cin-a” a cih leh, tua nu in,
“Sawtpi a tuang khawm ding lah hi lo hanga, a den mahmah cianga tuak pah ding hi lel sam hi ve hang, tua banga gen tangtang dingin gentaak lopi!” ci-in dawng kik hi.
Tua nu’ kammal in khiatna neisa mahmah ing. Tua nu’ kammal ah pilna (wisdom) omsa peuhmah ing. Ih nuntakna ah ngaihsun thei-in zui thei lehang a manpha mahmah ding thu khat hong hilh hi.
Khatveivei, i nuntakna ah i thuaklah valval na pawlkkhat tuaci bangin mu thei lehang a “puak” dan noptuak mahmah hi. Thupiang khatpeuh zong hi thei ding hi. Mihing pawlkhat zong hi mai thei ding hi. Nuam i sak het loh om thei hi. I lungduai zawh het loh pawlkhat om thei hi.
“Sawtpi a tuang khawm ding lah hi lo hanga” ci-in la thei ziau hi lehang i muh dan a kilamdang mahmah ding na tampi om ding. I nasepna mun ah maw? I innsung mahmah ah maw? I lawmte tawh i kithuahna leh i kizopna ah maw? Mun khatpeuh hi thei ding hi; i lakzia, i sanzia thupi mahmah.
A tawpna keii ah bel, na khempeuh “tawntung mun” a kici leh “tawntung hun” a kici tawh etkaak thei den lehang i muhdan hong kilamdang mahmah ding hi. Hih leitunga i tuahkhak thute, a nuam a nuam lo, na khempeuh, a tawntung ding hi zenzen lo hi. Tawntung mun leh tawntung hun manawh-a khualzin banga paipai lai hi hanga haksatna leh a nuam khol lo phial pawlkhatte nangawn “sawtpi a tuang khawm ding lah hi lo hanga” ci-in la thei lehang a puak zia nuam mahmah hi.
A langkhat panin en lehang, “sawtpi a tuang khawm ding hi lo” i hih manin itna leh hehpihna i lah theih nading hun zong saupi nei het lo hi hang, cih zong phawk ni. I zi i itzia, i tate i itzia, i nu i pa tungah lungdamna thukkik-a itna i lah theih nading zong hun saupi nei khol lo kha ding hi hang! I lawmte tung ah migitna i lah theih nading zong hun saupi nei lo hi hang. Hih leitung ah i gen kholh theih bangmah om het lo a sep dinga kilawm peuhmah tumahmah a i sep ding hoih hi.
Itna hepihna, lungduaina leh mite telsiamna, na khatpeuh sansiamna leh muhsiamnate a kisam mahmah hi, tuate i zat theih nading hun tampi nei lo hi hang. I phawk hunhun mah-a i zat kei leh hunte beibei hi. Mihingte i nuntakna buppi (1)Pasian it ding; (2) Pasian i it bangin i u i naute (neighbors) it ding, cih bek hi a, kei-a kipan kuamah kicing zo nai lo hi hang. “Sawtpi a tung khawm ding hi lo” i hih manin tuni mahmah in itna hehpihna lak tek ni. Kisin pah ni.
Khuamial sung pan khuavak nuntakna ah hong samkhia i Pa’ itna i lahkhiat ding hun saupi nei lo kha ding hi hang.
Eite in Amah i it ma-a eite hong it a eite mawhna panin hong tankhia dingin A Tapa hong sawl i Pa’ itna mite tung ah lakkhia ding hi hang. Tua Lungdamna thu Gospel i nuntakpih hun ding saupi nei lo hi hang. Nuntakna i cih tom mahmah mawk hi. Kum za bang nungta lehang zong kicing nai lo ding hi. Tuni-in kipan ni.
Hih thu phawk thei-in nuntakpih thei hi lehang i innkuansung, i pawlpi sung leh hih leitung mahmah ah bangzah-in kilamdanna a om zen tam! Kilamdang zo taktak ding hi. A nuam lua khol lote zong thuak siam-in, a hoih a pha sep ding zong uaikaii nawn lo ding hi hang!
Sawtpi a tuang khawm ding lah hi lo hanga maw!
Rev. Zam Khat Kham
Comment piaknop aomleh...