Kawlgam kumpi masapen Sao Shwe Thaik tanu Sao Hay Mar Thaik tawh holimna

Kawlgam kumpi masapen Sao Shwe Thaik tanu Sao Hay Mar Thaik tawh holimna

Kawlgam suahtakna ngah zawh 1948 kum khit (Union of Burma) kumpi sem masa penpen Pu Sao Shwe Thaik (The first President of Union of Burma/Head of the State) tanu Pi Sao Hay Mar Thaik tawh holimnakha dihdih ka hih manin, tuma kum tampi hunte ah ngaihsutnate kilehkik dandanin thu tampi hong ngaihsunsak kik hi.

Pi Sao Hay Mar Thaik in ama neulai thute leh 1962 kum Kawlgam mipi deihna tawh ki-ukna (Democracy ki-ukna) pan galkap ki-ukna ah mimal khat huaihamna leh gambup thuneihna abuluh Gen. Ne Win makaih galkap ngongtatte’ thu vuicingtak awling keuhkeuh kawm leh lungzuan khuangaihhuai maipuak tawh atute tungah alenlai hunte agen “Pi”khat bangin lungsim sungkhia aa hun beisa gamvaite hong luikhia hiathiat hi.

Pi Sao Hay Mar Thaik in hong genna ah amah pen tulaitak gambup thudotpinu (State Counsellor/Aung San Suu Kyi) tawh kikhangual (kha-5 amah uzaw) ban ah Yangon methodist sangah kahkhawm ahihna uh aneulai hunte hong gen beh hi.

Pi bel tu’n kum (73) bang phataphial ahih hangin alungsim navaak mahmah ban ah nisim thuciaptehna (Diary) nei denin ama’ nisim nuntakna leh Kawlgam gamthu ah thupi asak khangsawnte’ theihhuai athuciaptehna bu zong ong ensak ngiat mawk hi. Thuciamteh tiuteu mawk ahih manin tuni dong mah pausetset hak kingkeng lai mawk hi.

Pi in ka bilgei hong gen khiankhian khat ah bel 1962 kum gambup ukna teng Gen. Ne Win leh anungzui galkapte in alaak khit uh amau’innkuan sung ah dahna leh lamet beina khimkhua aziinnate tudong lungsimtawng pan athuaknate khawltheilo liang ding zahin hong susut nuam phial hi. Tua hunin (1962) apa Kawlgam kumpipa Pu Sao Shwe Thaik pen galkapte in atun abanna kitheilo ding aselcipna leh asawtlo hun teh asihna thute azakna naupangno numei khat in athuaknate aw ling kawmin hong luikhia hi.

Azahtakhuai Pi’ thugente ka ngaih kawmkawmin thu ka theihnop honkhat mah hunpha ngahlaitak aambawlin ka dong samsam zel hi. Tua ka dotnate tawh kizui-in ama’n hong dawnkikna ah tulaitak Yangon khualaizang Yangon University Avenue Street ah amau’innkuan neihsa innpi leh huangpi galkap thuneite in thumanlo alaaksakna leh Nyaungshwe khuapi, S. Shan State ah amau’innkuan ukpi innpi (ေညာင္ေရႊေဟာ္နန္း) tudong thunei kumpite in thumanlo akhakcipna thute mittui mualtuang kilhkelh kawmin hong suutkhia vawt ta hi.

Tua bek hilo 1962 gambup kumpi thuneihna galkapte’khut sung atun zawh a innkuan uh haksatna dahnate ban ah tulaitak gamvai tawh hong’zomto leuleu hi. Pi in bel agenna ah amau’unau lakah amah leh asanggampa Sao Han Nyaung Wai thu hong limgen to beh hi. Tulaitak Pi in High School Teacher Pension alaak khit ban ah khua-le-tui khantohna ding, Shan State sung nunmeite’ nuntak khuasakzia lapsang nading ngimna ahi Shan State Women Development Organization ah makai aseplaitak zong hi.

Pi pen Taunggyi ah atamzaw om-in anaupa Sao Han Nyaung Wai bel Canada gammi suakin Kawlgam kilemna lam ah amapangpi/leikhamangpi ahihna tawh hong zomto hi. 2010 kum pan hong kah thak kumpi Thein Sein makaih vaihawm gambup kilemna vaihawmna phualpi (Myanmar Peace Center)hun sung teng diak bang mualmi thautawite leh kumpite kihosimun “Pi” bang azahtakhuai lengla-in anasap zelna uh ong imkhia hi.

Tua ban ah khuisa kawm hiaihiai-in zahtak “Pi” in hong gen behna ah tulaitak NLD kumpi kah zawh amah bang mualmi thautawi makaite leh kumpi kimuhkhopna hunthupite ah kiphawkkha nawn hetloh ahihna hong pulak khuankhuan suak vet hi. MPC hun lai bel hong kiphawk zel sam naven tu’n NRPC hun (National Reconciliation and Peace Centre) teh hong ki napniit nawn kei zawsop e! ci hiat bek hi.

Myanmar suahtakna ding Miualtung mite leh zanggam Kawlmite kibelpawlna hun mapekin amau pen Shan ukpi nam hi uh aa, Myanmar gam suahtakna ngahzawh 1948 khit in zong amau Sao Shwe Thaik leh Shan ukpite Kawlgam mipi ki-ukna (Parliament Democracy hun 1948-1958) dong gambup innpi ah kiteel kullo-in gamvaihawm Innpi pawlpi ah kihelthei (Gtna :England Parliament ah House of Lords member dante) ahi uhhi.

Tua ban ah tulaitak Pi Sao Hay Mar Thaik in na asak simsim bel galkap puansuah kumpi Thein Sein hun nangawn suaktatak Kawlgam hong hawh hiathiat lel asanggampa Pu Sao Han Nyaung Wai abeisa hunkhat pan tuni ciang gamsung hong hawh theih nawn loh nading tulaitak kumpi in akhaktanna thute zong hacip kawmin hong suutto giap ekh hi.

Tualaitak ka gei vuah ka kihona uh hong zakha Shan party makai khat in nui kawm hiuhiausa-in Gen. Aung San in apa sam/pawlzot-in atanu in hawlkhia hi (1947 Panglong Thukimna ding Aung San in Ukpi Sao Shwe Thaik na zawnin atanu Aung San Suu Kyi in atapa Sao Han Nyaung Wai hawlkhia) cih kongzing ciamnuih Shan gam ah thang peuh mah e! hong cikiau se hi.

Bangbang hita leh leitung danin ukpi nam/kumpi nam ((Royal Family Member) khat ahi Pi Sao Hay Mar Thaik tawh hunpha ka ngah manin ama hong pulaak thu-le-late kei’ading manpha sa leh lametloh hun manpha hangin aangtang mahmah ing. Bob Tuangpi