Sanggam numeite ~ Lian Tuang

Sanggam numeite ~ Lian Tuang

“En ne kei ni in I nau ading koih ni, I nau in aktui lim sa lua aih ciang”

1. Unau numei no nih sun-an nek kawm in a kihona uh ahi hi. A u tan 2 hi in a nau KG akah laitak ahi hi. Inn ah anau pasal uh kum khat le lang pen om hi.

2. Nu le pate nasem kuan ding ahih manin zingan nek khit ciangin naupangte nih sun-anbel khat zang khawmin sangah kikha uh hi. Inn le sang kigamla lua ahih manin sun ciah zolo uh hi.

3. Sun sangtuah ciangin meltheih lawm le gual om mel loin sanginn mai a singkung nuai ah amau unau kizawn tawm in sun-an ne khawm uh hi.

4. Sunsiahmeh dingin aktui tangkhat le zasan meh hi a, meh tui ding tuithawl tawh tuisiang pua uh hi.

5. Tua ni zingsang a nu in aktui tawh anau neubel an a muapleh limnek mahmah ahih manin na nau in aktui limsa mahmah ei, an tampi tak ne ei ci in kipak takin gen hi.

6. Numei no te gel in sun-an ne ding a kithawi uh ciangin zingsanga a nu thugen phawkvat uh a “ Aktui ne kei ni I nau ading koih ni, I nau in aktui lim sa lua aih ciang” ci in amaute gel in zasan meh leh tuisiang tawh sun-an ne uh hi.

7. Nitak sang tuah ciangin sun-anbel sunga aktui pum a nau pia vauvau uh a, anau in ne muaimuai ahih manin kipak mahmah uh hi. A nu kiangah ka nau aktui kapiak uh leh lim sa lua ci in naklah liangin gen uh hi. A nu in no aktui koi pan nei acih ciangin ko sun-an zasan tawh ne in aktui ka nau ading sit hi ve ung ci in dawn kik hi. A nu zong lamdang sa lua in bangmah pau thei lo hi.Nehno in khitui luangin kun suk hi. Tawlkhat sung khitui mualtuangin dai dide hi.

8. Naupangte lungkim mahmah ahih manin amah zong lungdam kipak angtangna khitui nul khawmin naupangte a ang ah tawi in tu ni sanginn ah bang sin nai vua ci in hopihpih hi.

9. Hih thu pen kawl khua khat ahi Yasagyo khua a ka innkuan sunga thupiang ahi hi.

10. Hih thupiang ka muh ciangin u numeite sanggam numeite in a naute a sanggamte a itzia uh siam in lamdang ka sa mahmah hi. Sanggam numei, u numei a nei khempeuh in hih bang itna lainatna kingah kha ngei ciat ngeiingeii ding ahih manin sanggam numeite itsiam zahtaksiam huai mahmah ahihna phawk sansan ing. Lian Tuang