Russia – Ukraine vai nai 24 sung thu piang tuamtuamte

News Update: Russia – Ukraine vai nai 24 sung thu piang tuamtuamte

1. Russia galkap te in Ukraine ii Capital Kyiv ah lut in sim uh aa, mun khempeuh ah kikapna piang hi ci in CNN in genkhia hi. Capital Kyiv mun tampi ah bomb puak ham ziah ziah hi ci in Ukraine’s State Service of Special Communications in taangko khia hi. Russia te in Ukraine gam sung ah internet line khempeuh akhak tan zawh nang hanciam uh hi ci hi.

2. Russia in Ukraine abuluhna vai UN Security council ah statement thoh in adik lohna genkhiat theih nang resolution bawl ding vai pen Russia in ama veto power neih tawh nial ahih manin UN member gam 50 in alungkim lohna thu uh joint statement thoh in taangko khia uh hi. Russia in veto power tawh a nial zawh lian ciang UN Security council hong kah gam tuamtuam pan Palai te heh mahmah uh aa, Ukraine lam apanpih na un khutbeng ziahziah hi cin Ukraine’s ambassador to the UN Mr. Sergiy Kyslytsya in genkhia hi.

3. Ukrainian President Volodymyr Zelensky in Ukraine gam Russia khut sung atun loh nang ahih theih zah in kido kik dingaa, kinang ding hi ci in Capital Kyiv ii Lampi tung pan video khahkhia in genkhia hi. Russia ado kik nuam Ukraine gammi khempeuh thau pia in do sak uh hi.

4. Russia te in Ukraine gam abuluhna hang un EU leh North America gam 30 kipawlna North Atlantic Treaty Organization (NATO) in Leilam, Tuilam, Vanlam galkap leh galvan te kiginna tuni nei khin aa, akisap leh Ukraine lam pan huh ding ki ready ta hi ci in NATO Supreme Allied Commander Gen. Tod Wolters in tuni genkhia hi. Ukraine gam pen NATO gam ah lut theih nang a siauh lai tak hi aa, lut lian nailo ahih manin NATO in huh thei pak lo uh ahi hi. NATO ah alut theih loh nang Russia in akhak tan tan hi aa, NATO ah lut ding lau ahih manin abuluh uh ahi hi.

5. President Biden leh Ukraine President Zelensky te tuni minutes 40 sung phone tawh kiho uh aa, Russia tung khaktanna sanction bawl ding leh galvai lam ah kihuh theih nading kikupna nei uh hi.

US te in US galkap 7000 val Europe lam teng ah tuni puak leu leu hi ci in President Biden in genkhia hi.

6. European Union (EU) in Russian President Vladimir Putin leh Foreign Minister Sergey Lavrov te khantan na tuamtuam sanctions te bawl ding in geel ta uh hi ci in High Representative of the Union for Foreign Affairs and Security Policy Josep Borrell in tuni genkhia hi. United Kingdom (UK) Prime Minister Boris Johnson in zong sanctions tuamtuam bawl ding tuni in taangko khia hi.

More: Ka phawkkik thukhat ~ Pau Do Lian

7. NATO gam te ahi Poland and the Czech Republic te in Russia gam pan hong pai Vanleng peuh peuh agam sung uh lut sak nawnloh dingin khaktan ta uh hi. Tua bek thamlo in Poland gam in Ukraine tung Galvan tampi Tembaw tawh tuni in puak ta hi ci in Poland Minister of Defense Mariusz Błaszczak in genkhia hi. Update bawl to to lai ni.. Ref: CNN Breaking news Thomas On Sian Mung