Russia te huhnatawh Syria galkap te’n Al-bad khua gei aom IS te omna suksiatsak
Feb. 11, 2017: Russian Defense Ministry in nipini in Syria galkap ten Russia ten tung lam panin a huhna hangun ISte ukna Aleppo province sunga om al-Bab khua kiangah ISte pan mun suksiat sak gawp uh a, Syria galkap ten ISte 650 val golum in, a galvan koihna uh a hun khop suksiatsak uh a, al-Bab kianga on Tadif khua ISte khut sung panin hunkhia uh hi ci-in gen hi.
Russian Defense Minister in, “Tadif khua pen mi tam mahmahna khua hi a, hih khua-ah Syria galkap ten ISte 650 golum in, ISte tank nih, galdona mawtaw (armored personnel carriers) li, lampi khat panin lampi dang khatah a galvan puakna mawtaw uh 18, (off-road vehicles equipped with heavy weapons) leh mortar sagih leh a mobile zat uh guk hih kikaptuahna ah suksiatsak uh hi ci hi. Russian ministry in Tadif pen Aleppo province leilu nisuahna lam-a om hi a, IS ten kulh muanhuai tawh a umcihna uh khuapi hi ci hi.
Tadif khua Syria galkap ten a hutkhiat zawh nungun hih kiim-a gamtang Turkey galkapte tawh Syria kumpi in thukimna nei uh a, Turkey in huhna a piak Free Syrian Army opposition fighters kicite tawh gamgi zik pah uh hi. Tua loin Syria galkap ten Syria gam-a ISte’ khuapi Raqqa kiim-a mun poihmawhna lampi laksak uh hi. IS ten Raqqa zuatna lampite ah galvan leh bomb hoih nono phum in, tua munte panin a kisap galvante uh ngah den uh uh hi.
Tu lianin Syria galkap ten ISte ukna al-Bab khuapi leilu leh leitaw lam panin manawh uh a, Turkey galkap ten zong leilu lam leh nisuahna lam panin nawk uh hi. Turkey galkapte al-Bab khuapi laizang dongah lut zo ta uh a, khat leh khat kikaptuah khakna a pian’ khak lohna dingin Russia tawh thu kizasak den uh hi.
Al-Bab khua i cih pen Turkey-Syria gamgi a ISte hatna om sun hi a, hih khua pen Turkey galkap ten la zo le uh Turkey gam ah Syrian Kurdish rebelste a lut theihna ding dal thei ding uh ahih manin Turkey in hih khuapi lakna ding nung kum Aug. 25 panin na hanciam uh hi. Source: Sputnik/ Thang Khan Lian
Comment piaknop aomleh...