Russia in TU-22M2 Bombers zangin Syria ah IS te kap

Russia in TU-22M2 Bombers zangin Syria ah IS te kap

Jan. 25, 2017: Russia in zanhal in mun gamlapipi kap theihna Tu-22M3 bombers vanleng guk zangin Syria gam-a Dier ez-Zor ah ISte galvan koihna kapsak hi ci-in Russian Defense Ministry in zan in gen hi. Russian Defense Ministry in January 24, 2017 in long-range Tu-22M3 bombers vanleng zangin Iran panin leng khia in Dier ez-Zor province sunga om Tel al-Salhiya khua-ah ISte’ galvan koihna leh a puakthei galvan koihna mun kapsak hi ci-in gen hi.

Russian Defense Ministry in hih Tu-22M3 long-range bombers vanglengte pen Iraq panin Iran ah lengin Deir-ez Zor Province ah ISte galvan sengna mun kapsak hi ci hi. Syria ah a kapna ding uh a kap nopna mun teng a kap khit ciangun hih vanlengte Russia ah leng kik hi ci-in gen beh hi.

Nung kalin IS (Daesh) ngongtat ten Deir ez-Zor military airfield kicihna mun na umcih uh hi. Deir ez-Zor airbase pen Syria gam leilu-nisuahna lam-a om hi a, Syria galkap ten Deir ez-Zor military airfield pen Deir ez-Zor khuapi humbitna dingin pan munin a zat uh ahi hi. IS ten Deir ez-Zor military airfield lakna dingin galvan hoih nono leh sihpih bomb zangin suam mun mahmah uh a, ahih hangin tu dong Syrian Air Force ten na dal zo lai uh hi.

Russian General Staff tu ni-in IS ten Deir ez-Zor khuapi la kik zo le uh khuamite mulkimna bei-in lom thah ding uh a, Deir ez-Zor khuamite a bei dong that ding uh hi ci hi. Deir ez-Zor pen namgimtui/datsi (oil) khuk lianpi hi a, IS ten na la-in July 2014 dong uk khum uh hi. Tu dongin Deir ez-Zor khuamite leh galkap om ten vangleng pan bekin a nek ding kipuakte ngah uh hi. Source: Sputnik/ Thang Khan Lian