Russia in NATO te’ Missile Defence dalnading koihsawm

Russia in NATO te’ Missile Defence dalnading koihsawm

Nov. 22, 2016: NATO ten Russiate ngimna dingin Eastern Europe ah missile defence system kici a koih uh dalna leh kapsiatsak theihna ding ngimna tawh Russia in Kaliningrad ah S-400 surface-to-air missiles leh nuclear galvan kizat theihna Iskander systems kici koih sawm hi ci-in Russia parliament dawl tungnung a defence committee in the Federation Council kici a chairman Victor Ozerov in pulak hi ci-in RIA news agency in zan in suaksak hi.

Viktor Ozerov in NATO ten USte’ missile shield Russia tawh kinaih lua in hong koih ahih manin Russiate’ gamtat loh phamawh ta a, hih banga gamtang dingin hong kalh den uh hi ci-in gen hi. Kaliningrad pen Poland leh Lithuania kikal a om ahi hi.

Zan in zong Putin in USte makaih in Eastern Europe ah NATOte galphual satna thu dal ding dan leh a kihtakhuai zia gen hi. NATOte gamtatna leh thukhensatna hangin kilunghimawh a, ki-om hithiat nawn lo ding hi ci-in Russian TV ten documentary interview a neihna uh-ah gen hi. “Bang kihih ding hiam? NATOte’ missile systems dalna ding (countermeasures) in gamtat loh kiphamawh ta a, dal ding cih ciangin ngim ding cihna hi,” ci-in gen beh hi.

Novaya Gazeta newspaperte’ Defence analyst Pavel Felgenhauer, in Russia in hih galvante koih ding vai pen NATO ten a koih sawm ua kipanin koih ding na geel khin pah uh a, kum khat val ta hi ci-in Al Jazeera newste kiangah Moscow panin gen hi. “Hih ballistic missiles longer range leh anti-aircraft missiles longer range-te pen a beisa kum khatin Russia in koih ding na geel khin zo a, a hatzaw zang le uh NATOte patauhna piangsak ding cih ngimna hi,” ci hi.

Russia in a beisa in zong Iskanders kicite Kaliningrad ah na koih thei zel a, ahih hangin galdo dan ding kisainna bekin na zang a, tu-in Parliament in thukim ta ahih manin koih den ding cihna suak hi. Ahih hangin Russia in NATO ten Russia nitumna lamah galphual a bawlna dal ding zia pulak nai lo hi.

US in ground-based missile defence system thak pen May kha-in Romania ah na koih a, tu-in anti-missile platform dang zong Poland ah koih beh sawm lai uh in bawl lai uh hi. Russia in USte hih bangin a gamtatna uh pen 1987 in US tawh Europe ah kilemna a om theihna dingin thukimna kinei sa tawh kituak lo a, US in hih “1987 deal” kici palsat hi ci hi. Source: Al Jazeera And Agencies/ Thang Khan Lian