Rohingya omlo cih lungphona tawh Malaysia tembaw kidawntuah

Rohingya omlo cih lungphona tawh Malaysia tembaw kidawntuah

Kawlgamsung aom Rohingya Muslims te huhna apuakding in Malaysia tembaw Thursday ni in Yangon Port hongtun ciangin, Rohingya te adeih hetlo Kawlgammi honkhat in lungphona tawh na dawntuah uh cih AFP pan kiza hi. Tua huhna puakding in hongpai Malaysia tembaw pen “Nautical Aliya” cih minnei tembaw khat ahihi.

Hih tembaw tungah Malaysia panin Health Workers leh Activists honkhat kihel a, Kawlgamsung aom abiakna kibatpihte uh huhna puakding in hongpai uh ahihi. Tembaw sungah nektheih tuamtuam, zatui leh niklehpuan “Food, Medical Aid, Clothing” honpikhat pua uhhi.

Hih tembaw avadawn Kawlgam ulian lakah Social Welfare Minister zong kihel hi.

Ahi zongin alanglam ah hih tembaw vaidawn veve mipi honkhat naki kaikhawm uh a, vaidawn veve cihhangin hihte vaidawnna pen tawldamsak hetlo khading hi. Rohingya te huhna puakding in hongtung tembaw pen “No Rohingya” cih Signboard lianpipi tawidada in Burmese Buddhist Monks honkhat leh mipi te’n lungphona tawh na dawntuahmawk uhhi.

“Patriotic Myanmar Monks Union” panin Buddhist Monk khat ahi Thuseitta in agenkhiatna ah “Kawlgam sungah Rohingya cih minam omlo ahihlam ka theisaknuam uhhi” ci’n genkhia hi.

Kawlgam leitangtung ah kumtampi aomkhitphial hangin hih tulthen tampi apha Rohingya kicite pen Myanmar Citizenship kipiaksawm hetlo hi. Hih Rohingya vai ah Burmese Buddhist Monks te lungso phadiak uh a, huatbawl vilvel uhhi. Hih Rohingya akicite pen Bangladesh panin Kawlgam sungah hong guklut “illegal immigrants” te hilel uhhi ci’n tangko khia ziahziahlel uhhi.

Kawlgam sung aom Rohingya te kibawlsia cihtawh Malaysia aom abiakna kibatpih te’n huhna piading in tembaw tawh hongdelhliang uh ahih manin, Buddhist Monks te adingin ngaitsut sakleng ahuat huaikhat himawk mahhi.

Kawl kumpi inzong hih tembaw pen Kawlgam tuihuangsung ah lutding aphalmasak hilo a, Rakhine State ii khuapi Sittwe ahzong lutding aphal uh hilo hi. Tuahang mahin tembaw tawh hongpuak uh huhna te Yangon Port ah pawlkhat suahkhia uh a, adangteng Bangladesh gamlam ah apuak uh ahihi.

Abiakna kibatpih gige ahi Bangladesh kumpi inzong hih Rohingya te huhna apuakding tembaw pen agamsung ah alutding deihlomawk uhhi. ZD Sawltak #zomidaily