Remembrance Day (Lest we forget) – Phawkden ni (Manghilh kha leng)

Remembrance Day (Lest we forget) – Phawkden ni (Manghilh kha leng)

(November 11th, 2013) You fought yesterday so we could have a brighter tomorrow. Greater love hath no man than this, that a man lay down his life for his friends. (John 15:13 KJV) A hero is someone who has given his or her life to something bigger than oneself. (Joseph Campbell)

Zomi te aa ding leh Zomi te tang’ ding in, a nuntaakna, a hun,tha leh ngal, sum leh paai piakhia khempeuh’ keikhom in hini pomkawm in, zahtaakna kapia hi. Ni khat ni teh, Zogam ah zong a maute phawkna, mun leh mualsuangte, leh ni thupi khat a kiciapmteh hun hongtun ding’ ih biak Topa’n Zomi te hong kalsuan pihlai ta hen.

Remembrance Day pen leitun galpi khatna(WWI) hong daih ciaptehna, 1918 November 11 ni, leh tua hun aa kipan, gam leh minam ading’ a nuntaakna, a paaikhia’ paaltan te phawkna hi pi pen aa, UK, Australia, leh Canada te a kipan Britain Commonwealth sung a om gamteng in a natan uh nithupi a hihi. USA te’ Memorial day a cih tawh a kibang in kigen a hihi.

Kumsim November 11th ni, 11:00am in gambup in, minute 1 sung gamdaihna tawh zahtaakna pia in, a kinai pen nipi pen Remembrance Sunday ci uh aa, gam nasem te aa ding thu ngetsak uh hi. Mipi lampan zong, gamkem paaltan te huhna ding Poppy Appeal ci-in panpihna nei uh a, paaksan laivom khat, November/tukha sung in, na suang leklak se uh hi. Mangkangmi te pen, ki-it mahmah uh aa, ki-it dan zong siamse uh hi. Gal sung aa a site khempeuh, leitung galpi te aa ki pan, tuni ciangdong mah, inn ciahpih ciatciat uh hi. A hihna uh leh a lungdamna uh a manghilhlo minam ahih man in a etteh leh a zahtaakhuai minam a hi uh hi.

Hi thu zui in, England gam leh Chrisitian pawlkhat te’n, November kha pen a sisa itleh ngaihte phawkna kha ci-in, thupha bawlding na kihanthawn uh hi. Hunbeisa, a thuphate luanna naak uh, a lungngai uh hi. Zomi te zong taanglai in, khat in a hong nusiatciang’ a-ni-a-kha in ki koih phot kici aa, tua bek hilo, a hunzui-in sep leh bawl khat a neih uh ciang’ a manghilh hetkei uh hi. Tua teng hang hiam? Zomi-te misi deihte ci-in hong kimin vawh liang a hihi. Christ ih theih mapek in, itna-gamh a nei te ih hih, lungdamh-huai thuthuuk khat a hihi. Ih Khanglui te’ Mangkang te mahbangin, sihkhit nung nangawn ah, ki nusia lo uhhi.

Khangthakte a hih leh, a paisa te cih genloh a hinglaiteng nangawn’ ih ki-it/kipanpih nang’ ih ki hanthawn niloh ta hi. Muu-khat/pee-khat peuh deihna, leh midang khatpeuh maitang muhnopna tawh, khat leh khat ih kizuak ding’ hamsa ih sakei a, salnamkim sung’ ah ki taang/awk kha pahpah hi. Ih mipih,makai khat a hizong muhmawh na khat a om leh kei hun ding hita! ci-bang keek maw? Thuciing thuciamteh thei meello maw? Theilo. Hun thupi te-ah ki phawk sawm melllo tawh ih kibang ta aa, mun pawlkhat bang-ah, ki thukhual khialkha theilai zen hi.

Taaglai pekpan, Pasian hong piaksa itna-gamh leh cihtakna te dipkik’ lakkik huaita lo hiam?

A beisa Kawlgam ki-ukzia,nuntaakzia hangin, a nutaakna paai Zomi te leh, pianna Zogam nusia aa, khualgam aa, a busa’ a mangthang Zomite khempeuh aa kipan, lamkal aa, a vaithaam a mangthang Zomi khatciat te phawk in,lunglen khuangaih huailua ta hi. Sian in, hongsiam ding aa, Zogam hong paallut niciang, muntuam gamtuam aa om, ih mipihte guhteng kaikhawm in ih gamciah pih ding hi hang. Tuani hong tun ma-in, a paisa ih minam makai te a kipan, mimal khat ciat, Zomi laibupi sungah ciamteh aa, ih hih thei zah-in, zahtaakna pia in, phawk ding, manghilh lohding’ a thupi a hi hi.

Nungdeuh aa hong paisan ahi, Dr. Do Kham bang, Zomi mintawh a hi zong, a diakdiak in, a ma panmun letna, kihel ngei -na, LZI(LZI nuai aa kipawlteng), ZIUSA leh GZA cih bang min tawh a ma-nung mipi kikaih khopna masa pen ah, zahtaak piakding kilawm khat a hihi. Football Club khat nangawn in, a team member ngeikhat in a nusiat ciangin, tournament bup a hi keizong, a game masa pen ah, zahtaakna pia hamtang uh hi. Ih hinlai-in, ih ki pahtawi mankei zong, a nung beekah, kiphawk leng, a omlai leh khangsawn te minam aa ding mailam kalsuan na ah, lawphuai tuam mahmah zawding a hihi.

Aih leh, Remembrance Day etteh in,eizong ih pianma pek aa kipan’ gamlehmite-it aa, hidong ih tun theihnading thalehngal,nuntaakna siitlo, thupha a bawl, a paisa te’ phawkna leh lungngaihna tawh, nitum ngeilohna-gam a kici ngei liang Mangkanggam (British Empire) te bangin mithupi thuphasang te’ ih suahding lunggulh huai talo hiam? Nantal’suan