Refugee nuntakna pan South Australia Governor dinmun tungtota

Refugee nuntakna pan South Australia Governor dinmun tungtota

Hieu Van Le pen Vietnam gamah asuak hi a, Australia gamah Refugee galtai dinmun tawh atungkhat ahihi. Ahi zongin tu’n Hieu Van Le pen South Australia ah Governor dingin panmun ngahto tamawk hi.

Hieu Van Le genkhiatna ah Refugee dinmun pan South Australia Governor dinmun katuntheih nadingin hamsatna kaphutkhak tawmlo hi ci’n genkhia hi.

A lamkiatna gam Vietnam ah gal atun ciangin 1977 kum in Hieu Van Le leh azi pen gunkuang tawh hong taikhia uhhi. Tuahun laitak in Hieu Van Le pen kum 23 bek phapan a, azi pen kum 19 bek phapan hi.

Tuahun laitak pen hong taikhiatna leitang ah galgim vive tawh aki dimlaitak hi a, anungta in kong taikhiat theihzong alamdangpi khat hi ci’n Hieu Van Le in genkhia hi.

Tuipi tungah gunkuang neuno khattawh hong taikhia uh hi a, nithum sung tuipi tungah huihpi guahpi nawk in, tua kawmkal ah Indonesia gam atun ciangin meimual Volcano nakitam sawnsawn ahih manin, hamsatna tampitak nawkkha uhhi.

Thai gam atun uhciang in Thai gamah lutding kiphallo sawnsawn ahih aman, Malaysia Refugee Camp ah hong tungkha uhhi.

Refugee Camp sung a ombel mihingkhat anuntak sungah abaihlo penpen hun hikhading hi ci’n Hieu Van Le in hamsatna athuaklam genkhia hi.

Malaysia panin gunkuang akehpian nipnep khattawh Australia gam zuanding in hongki pankhia leuleu uh a, laupipi mahin Australia gam, Darwin Harbour hongtung liamliam uhhi.

1976 kumpan 1980 kikal in Australia kumpi in Vietnam Refugee mi 90,000 agamsung ah lutsak uh a, tuapen Vietnam Migrant misa hipah cihi.

Australia gam atun ciangin minam ki deidanna hamsatna omveve a, ahi zongin ama adingin lametna thak tampi mukhia hi.

Pilna mah na bulphuh masapah a, Accounting Career tawh kisai in Australian Securities and Investment Commission (ASIC) akici Course asin tohpah banah thumanlo golhguk neksim cihte zong nakpitak in na lehpan pahhi.

Atom in Hieu Van Le nuntakzia tuaciang hi a, Zomi tezong Hieu Van Le etteh in ih tuntunna gamah ih hanciamding ihki hanthawn nuam hi. Pilna mah bulphuah masa in, thuman thutak leh Pasian thutawh nungtakhawm leng gualzawhna in ihmai ah hongngak gige ding ahihi. ZD Sawltak #zomidaily