Rastriya SwayamSevak Sangh (RSS) ~ Pau Tun Thang

Rastriya SwayamSevak Sangh (RSS) ~ Pau Tun Thang

India gama Hindu ahi lo biakna dangte a buaisak nuam den pen RSS tea hi hi. A diakin Khristian leh muslim te adingin lauhuai mai uh hi. RSS cih ciang ‘Rastriya Swayamsevak Sangh’acihna hi in Hindu extremist pawlte cih ding hi pen mai hi. Dr. Keshav Baliram Hedgewar in kum 1925 September kha in Maharashtra ah na din hi. A tup leh ngiim uh India gam Hindu te vaihawmna gam ‘Hindu Rastra’ suahsak ding ahi hi.

A malakna uh leh nasepzia thangsak nuam khollo uh hi.Amau pawla lut ding khatpeuh India gam leh nam leh Hindu biakna gum dingin kiciamsak (Oath taking) masa zel uh hi. A tungin phatuam ngai pawl dana kidin himahleh politics lamah hong kigawlh pian ta uh hi. RSS makai Guruji a cih deep uh MS. Golwalkar in,” India gama Hindu ahi lo khempeuh in zong Hindi culture zui in Hindi pau siam uh hen.

Tua banah Hindu gam zah tak mah mah ding uh hi. Hih miten ki deihsakna te lunggulh lo ding uh hi.India gam pen Democracy gam dingin kilawm lo hi. Socialism zong gamdang pana mikhual hong lut hi lel in, India constitution zong phuahtawm hi. State Assembly leh kumpi phiat in kumpi khat bek om hen” ci in gen hi.

Kum zalom 19 na hun laia Hindu te nuntakzia thaksuahsak kik ding pen a tupna khat uh ahi hi.India cih pen Hindu Culture tawh kizawm hi cih biakna dang zui ten a theih ding deih uh hi.India cih ciang Hindu cihna dan in ngaihsut ding a deihna uh hi.

A tup leh ngimna uh om bangin BJP in politics lamah ma la hi. Bajrang Dal zong a madawk khat ahi hi. VHP pen leitungbup a huam aki zopkhawmna uh ahi hi. Pawl tuam tuam Shiv Sena, BMS leh Hindu Munnani etc. ten Hindu ngeina kembit dingin RSS leh VHP te nuaiah nasem uh hi. Biakna dangte dawp sawm vetlo vial uh hi.

Khristian leh Muslim te Hindu a suahnop kei ua leh melma bangin ki ngaihsun ding cimawk uh hi.Hitler in Nazi German nam gual tungtuang hi a cih zel mah bangin leh Jud ate a vatmai bangin malak zong kuul kha ding ci uh hi.

A lungsim uh i gensa dan himah leh thakhat thu in gamtang pah buat buat sam lo uh hi. Siam tak leh pil takin kalsuan zaw uh hi. Phatuamngai pawl ahihna ah siat tuahna khawngah bel pahtaak huai vanglak uh hi. Andra Pradesh a tuikhanna hanga haksatna thuakte leh Gujarat a ziinling hanga haksatna thuakte bang naakpi takin huh uh hi. Laisinna school lam zong thupi ngaihsut mah mah uh hi. Kum 1977 in ‘Vidhya Bharti’ hong uh a, school lamah nasem uh hi.

India gam mun tuam tuam ah ‘Shishu Mandir’ leh ‘Bal Mandir’ lam uh hi.North East India nangawn ah school leh hospital bangzah hiam hong khin uh hi. Arunachal Pradesh-bangah Social Experiment in Inter-State Living (SEIL) hong ngiat uh hi. Naupang kum 4 gual mi genthei te tate state tuam tuamah kepsak uh hi. Amau thu zui dinga a lungsim a zawh khit ciangun ciahsak kik lel uh hi. Mizoram ah zong Central School hong nuam uh hi. Pau Tun Thang