Queensland Brisbane zinna

Queensland Brisbane zinna

Ka omna khua uh Khuano thilthel nusia in ni 22/12/14 nitak zan nai 11:30 pawl in ka omna uh panin Meileng tawh Brisbane zuanin ka dingkhia uh hi. UPa. Pau Muan tawh ka hi uha, Meileng phualciang Life house Church Founder & Pastor. Steve & Bev te nupa in a Mawtaw uh ahoih mahmah pen tawh hong kha uh hi. Ka dinkhiat dinguh zansawtlua ahih manin hong khadah un, Taxi khat peuh lalel nung, kisuan huailua hi, ka cih hangin ki nial zolo a, hong itdan uh lamdang kasa hi. Bang hang hiam cih leh mi a tamzaw zingsang thobaih in vaikuan dinguh ahih manun nitak nai 9:00pm in a lupna tung uah a tamzaw omkhinta uh hi. Meileng omna phual ka tun uhteh thu hong ngetsak uha, ka kikhen uh hi.

Pasian ompihna hangin ni 23 ni zingsang nai 4:30am kimin Brisbane Meileng khawlna phualpi ka tunguh hi. Meileng khawlnate pen Kawlgam leh India bangin va-ak leh zusa kimu hetlo ahih manin siangtho mahmah ahih lam ka phawk hi. Mi zong kiphu niainuai cih bang omlo in Meileng zong ging dada sak selo uh hi. Naikhat kim bang Khuasung paina Meileng(local train) ka ngakkhit uhteh hong tunga tuan pan tai leuleu in ka pate omna veng ciang ka tuanguh hi. Meileng panin ka tuahkhiat uh ciangin ka nau Suan Lun in hong dawn a, zingsang nai 6:00am kimin inn ka tunguh hi. Ka vengpa uh Pa. Mung hong vakpah in ka holim uh hi. A sawtlo in ka tunding kal uh angak lah leh hong phawk den ka Ni Mung hong hawhpah hi. Amah pen Delhi ah ka omlai un ZCF,Hastal Pawlpi ading nget kullo in minam a itna tawh Sum honpi khat hong khak ngei hi.Tawlkhat ka holim uha, aciah khit uh ciangin kisil in zan limtak ki ihmu theilo ahih manin tawlnga in ka ihmu hi. Ka tun a zak ciangin kapu Thawngpau leh mi pawlkhat hong hawh uha, ka ihmut suaklua ahih manin bangmah ka phawk kei hi. Nitak ciangin Sm. Cingbawi, ni Man te innkuan, U Khen Thangte innkuan leh meltheih u le nau tuamtuam hong hawh uha, khualzin Khualam ciah ka bangke a, nuam kasa hi.

A zing ciang ni 24 in pu Sial Thang tawh vak in van kisam pawlkhat kalei uh hi. Sun in UPa. Pau Muan in zingciang Lungdambawl sun hun Zomi Hope Centre ah hun nong zangh thei diam, cih a Meeting na panin hong Phone a, na lawmte tawh naki thukimna mah uh hiam, nangma hong pum deihsak pong mawk khawng ahi hiam, kacih leh hi kei e, ka ki thukimna uh hi, hongci ahih manin ki ngah ei, ci-in lungdam tak in kasang hi. Zan 12 dawnna biak-inn gamla lua ahih manin Sia. Do Lian te’n ah bawl uha, kava ki hel hi. Tg. Lianpu leh Sia. Do Lian in hong makaih a, nuam kasa hi. Brisbane aom eimi Pawlpi omkhempeuh biak-inn zangthei omlo in inn ah a bawltek uh ahi hi.

A zingciang ni 25/12/14 Lungdambawl sun hun thugenpi dingin kei hong khiat uh ahih manin Matt 2:1-3; Lk 2:8-10,13,14 bulphuh in thapiakna ka nei hi. Sia nih aom kawmkal ah kei hong khiat piak mawk uh pen hong neek ngaih dan, hong deihsak dan uh thupi kasa a, ka kisuang dekliang hi. Tomgen mahmah ding ka cih leh naikhat leh setkan 50 kim kagen khamawk a, kua theihpih loh in ka kisuang peuhmah hi. Khangno Praise & Worship makai te Hill song te mah bangin siam uha, Zomite zong ki maimai vetlo ahih lam hong phawksak hi. Ciahciang in Pa. Thawng Mawtaw tawh tuangin Mawtaw tungah Sia. Do Lian in Kumthak zong kokiang mah ah hong zanghlai in hong ci ahih manin ka sangpah hi. Nek le dawn bel alim leh lim loh bel theikhang in gilmul vangliang a kine in kokhua papi khat pau leh ki ikkhia hiaihhiah tekmai cih ding hi.

Ni 28 Sunday ni ZCF ah hun zang dingin Nu Mung in hong gensa himah leh Pawlpi pawlkhatte danin eiciah khitteh ki mainop mawhna aom khak ding utlo ka hih manin na upate un hong theihpih hiam, cih ka dot leh hong theihpih mah uh hongci ahih manin lawptak in Jn 17: 11b,14-16, Matt:5;16 bulphuh in hun ka zangh hi. India ah ka omsung ZCF te tawh na semkhawm ka hih manin kaki lengla ngaihsut het kei hi. Makai pawlkhat zong Delhi pan vive uh ahih manin hunlui hong phawksak hi. Praise & Worship pen uham leh khangno te’n hong makaih uha, khangnote a pattah zia uh, khat le khat a pankhop dan uh thupi kasa hi. Zongh nuam mahmah hi. Thu tom gen mahmah ding ka cih leh naikhat kim mah ka genkha leuleu hi. Pasian thugen pen khat veivei ei deih bang lian a, I khawl theih, I bawl theih loh hun zong om mawk hi.

Kumthak dawnna pen Zomi Hope Centre ah zatding in Sia. Do Lian in hong genkhin ahih manin a dang hong ngai omta leh zong na sangkhin ka hih manin ka pailoh phamawh hi. Josh 3:5 bulphuh in maikum kalsuan dingzia thapiakna ka nei hi. Kumthak sun hun zong amau kiangmah ah ka kikhawm uha, la dawngkhat kava savial hi. Thugen lasak pen zaknop asa kei phial zongun nuam kasa mahmah lel hi. Nek le dawn zong lungdambawl amah bangin lim-in ciik hi.

Kumthak nipi masa ni 4/01/15 ni pen Emmanuel Church ah hunzangh dingin ka lawmit UPa. Khaitawng in hong gen hi. Na Pawlpi makaite un hong thukimpih mah hiam, nangma hong deihsak mawkkhawng ahi hiam, cih ka dot leh hong thukimpih mah uh, tua dan vaikhawng aomteh aki kum tangtang’ hi ung, hongci a thupi kasa hi. Delhi ka tuncil un amau nupa zong kitam theih nailo uha, nungak tangval tuak mah hi-in Kota, Rajasthan a Emmanuel Theological Seminary Sang ah a lawmnu tawh ka kahkhawm uh hi. A kum kik ciangin amah hong kah a, Sang manciang in Pasian in a mana semkhawm dingin mipi mai leh ama mai ah nagawm a, thupi kasa hi. Australia a tun uh zong na sawtlua lawmlawm nailo napi’n, nasep hoih zong nangah in eimi nasep kician neilo honpi khat bang nasep na guanzolai hi. Pasian in ka Sang kahpihte hong zatsak mahmah ahih lam kaphawk a, ka lungdampih hi. Delhi ah kaom lai in huhna ka nget leh ka ngetzah mah hong khakpah lian hi.

I gending bang genkha naikei zezen hangin I gennop lam gen kik leng, biak-inn kician zong na ngahkha uha, kikhop zong a dangte mah bangin nuamin tukum Pawlpi makai thak a apni uh tawh kituak ahih manin ka thulu leh ka LST ki ginsa laih in Effective Leadership & Effective Discipleship cih thu tawh kisai Lk 22: 26, I Pet 5; 3-7 bulphuh in thapiakna ka nei hi. Hun manciangin Pawlpi makaite tawh theitui dawnkhawm in ka om laitak Love gift limci mahmah khat hong pialai mawk uh ahih manin nuam kasa kei liang hi. Topa’n a zah tampi in na thuksak kik hen.. Pawlpikem Siapa. Sia. Muan Thang in inn dong, a Mawtaw tawh hong kha hi. A ciah dingteh thu hong ngetsak in hong ciahsan hi. Sia, Muan Thang pen a zi Mangkangte hi-a, a pasal a zahtak siam dan, a tate a pattah siam dan thupi kasa hi. Namdang zi/pasal I neih leh tuadan lungsim neite ngahzawh ding thupi kasa hi. Ni 29/12/14 ni-in ann hong nekpih uha, nitak nai 10 val bang ka holim uh hangin phun vetllo in a lupkuan uhteh a tate un apa biang namciau in lum uh hi. Zansawtta ven na lawmnu in bang hong cih tam maw, ka cih leh hong telsiam mahmah hi, hong ci a, thupi kasa hi. A Library hong etpih a, Manglai tawh kigelh laibu tuamtuam tampi nei-in Zolai tawh a kigelh ZOLUS leh pawlkkhat zong nakam sam hi. Zo Chronicle a zuak bunih na omlai ahih manin bukhat hong leisak in kacih leh a Sum hong pia dahin hong ci-a, lungdam tak in ka ciahpih hi. Ann ne bek hilo Letsong lianpi Zomite go manpha pikhat khat ngahlailai ka hih manin ka lungdam diak hi. Tutung Brisbane ka zin bel kisik hetkeng ei!

Brisbane ka pai dingin ka lungsim sungah Lungdambawl leh Kumthak sawngteng ahih manin mi khempeuh in hun gelna neikhin ciatding uh ban-ah khanih sung Pasian thu genlo ding cih gelna om kiukiau ahih manin Brisbane kapai dingin zongh, Pulpit tunga ka zatzel Lai Siangtho zong pualo in nisim a kasim zel Manglai Siangtho buneu pen bekh ka pua hi. Hici bang kawmkal ah Ama(Pasian) thugen dingin hong nakzat zawsop in Letsong khawng hong sangsak lailai ahih manin Pasian hong sapna, hong tha piakna, kong ompih takpi hing, cih hong ki latsakna, hi dingin ka ngaihsun hi. Lamkhat leuleu ah satan in hihpa ka ze et zo hiam cih hong sinna zong hithei dingin ka lamen hi. Mihing ngaihsutna, gelna leh Pasian ngaihsutna, gelna na ki bangkhin hetlo ahih lam ka tel semsem hi.

Brisbane khua pen ka up mawh sangin ana thupit zawk ban-ah University thupi tampi leh Lai Siangtho Sang thupi tampi tak na omna hi. 2014 kum G-20 Khawmpi a tunna mun zong hi-a, tulaitak a US President asem Barack Obama leh leitung mipil mihau tampite sitna leitang zong ahi hi. Katam sunguh ni 13 sung hi-a, Inn 13 ah ann ne-in ka pai uha, ka pai manloh na uh zong tampi tak omin pawlkhat in a Sum a hong piak tawh ameh a, hong pia tawh cih bangin om uh hi. Lengla zong a ni ni-in ki tatsat loin om den a, ko leltak I Pasian leh Brisbane aom I mipih te’n hong itdan uh hong ngaih dan uh lamdang kasa a, Kumpi David in Pasian aw hizahta a nong it na dingin kei in kua hi-a, ka innkuanpihte in bang hilel ahi hiam, acih kaphawk hi. Kuama inn ah ka vak man mel loh uh hangin Lungdambawl leh Kumthak huhau in vaitampi anei dinguh eimi sungah makai pawlkhat Sia. Do Lian, Sia. Mangpi, Pu. Thang Muan(Sitnipa tupapa), Pa. Piangpi tulaitak Zomi Innkuan President, Dr. Muan Thang, Sia. Thang Deih leh meltheih tanau lawm leh gual tampi tak hong vak uh a, mipi hong tangsak in Gospel pai, ulian khualzin khawng ka bang liang uh hi. Brisbane Zomite aw, nong bawl dan uh kisuang liang ing. A ban hun neihteh zoplai ding.

Khaibawi