Putin’ lawmin US Secretary of State lenkha thei

Putin’ lawmin US Secretary of State lenkha thei

Dec. 15, 2016: US President kiteelcing thak Trump in Secretary of State len dingin Putin’ lawm ahi Exxon Mobil CEO Rex Tillerson Kiginnin zan in a minseh/min teng khia (nominated) khin zo a, Tillerson pen Secretary of State len thei ding dinmun in om hi kici hiauhiau ta hi.

Ahih hangin Tillerson pen Cabinet post sunga panmun lian len dingin foreign policy leh diplomacy lamsang sinna panin theihna (experience) hau lo hi ci-in Republicans sungah pawl khat (Marcus Rubio kihel in) langpang uh a, tua loin Russia tawh kizopna (connections) a neih banah Putin adingin a lawm hi ci-in Democrats lam ten lipkhap mahmah uh hi.

Tua banah Trump in zong Russia tawh kilawmtatna (relations) puahphatna ding gen thei zel ahih manin Russia tawh kizopna nei khat Secretary of State lensak ding cih pen Republicans sung mahmah ah zong a mit kisat gapgap tam pian hi kici hi.

Trump in a nih veina dingin Kiginni in Tillerson mimal/a tuam ngiat in (privately) New York ah kimuhpih a, nipi ni-in a interview na-ah Trump in Tillersong phat mahmah a, “”World-class player hi” ci hi. Trump’ transition team in tu kal bei ciangin Secretary of State len ding kipulak ding hi ci uh hi. US House Speaker Ryan in zong Tillerson deih hi kici hi.

More: Christian Hymn te’ tangthu: Kei’ Ading Tam Khang Suangpi

Tillerson in a company Exxon pen gam tuamtuam ah nei a, Exxon’s Russian energy business kici Russia ah zong nei a, Russia ten gamdangmi pahtawina sangpen a piak uh Russia’s Order of Friendship kici zong na ngah ngei hi. 2014 in Russia in Ukraine sim in Crimea laksak hi ci-in nitumna gam ten Russia ngawh a, tua paulam in US leh Europe gam-a USte kipawlpih gam (European allies) ten Russia tungah khalna/gakna a bawlna thu-ah zong Tillersong in na langpang hi. Source: Al Arabiya/ Thang Khan Lian