Pulnatna le Biakna ~ Job Cinpi

Pulnatna le Biakna ~ Job Cinpi

Covid-19 tawh kisai biakna makai pawlkhatte tungah thumna le mipi lam pan a theihhuai thusim pawlkhat – Biakna makai Siate aw, no makai Siate pen mipite sangin Pasian na up na muanna uh khauhpai zaw kha ding hi. Laisiangtho simna le thunget cihte ah zong mipite sangin hun na la zo zaw ding uh hi. Tua hangin ko na nung uh hong zui mipite sangin gentheih haksatna na thuak zo zaw ding uh hi.

Nat le sat thuak hun ciangin zong ko mipite sangin Pasian na up na muanna uh khauhpai zaw ahih manin zatui zaha hek kul loin thungetna tawh na dam zo kha mah ding uh hi. Ahi zongin tu tunga hong thang vangvang ahi pulnatna tawh kisai thu ah, ko pawlpi mimalte nong khualna un biakinn sungah kikaihkhop ding le inn khatpeuh sungah kikaikhawm a thungetna neikhawm ding cihte sangin no Pasian thu lam ah upna a picing zaw deuhte in inn sungah antangin mipite adingin khitui naptui luang ahi liang kei zongin thu nong ngetsak ding uh kong lamen zaw uh hi.

Bang hang hiam cih leh a tunga ka gensa thu mah bangin no makai Siate pen Pasian na up na muanna uh hangin natna hong kilawh zo lo kha thei mah dinga, hong kilawh phial mah leh zong na upna un hong damsak zo kha mah ding hi. Ahi zongin no makaite bangin upna a khauhpai zo lo, ko mipite pen ka upna uh tawh natna dal zo lo damsak zo lo ding ka hih manun no hong kikawh ding na lau kei uh zongin ko a lau thei mipite nong khual ding uh kong thum nuam hi.

Pawlpi mite sungah nu le pate sawl zawh thu tawh biakinn a zuan zong om ding uh a, pawlpi sungah panmun len khat ahih manin kikhop loh kilawm sam lo ding cihna tawh biakinn a zuan zong om thei kha ding hi. Tua mah bangin midangte zong kikhawm sam uh a kei kikhawm kei leng Pasian ka upna nei hong kici kha ding cih ngaihsutna le zumna launa tawh midangte cih a nial ngam lo, midangte cih bang peuh a gamta mi pawlkhat zong om dingin ka um hi.

Tua ahih manin no makaite bangin Pasian tungah upna le muanna a nei zo lo ko mipi nautangte huamkim a thu nong ngaihsut ding uh kong thum phapha nuam hi.

Mipite theih ding thu

Hih thu pen mimal kigensiat nopna hi lo ahih manin mimal kisuan nading om kilkel lo hi cih kong gen nuam masa hi. Mi pawlkhatte ading a zakdahhuai phial thu khat gen ding hi leng makaite sung mahmah ah zong mipite muhna ah hih makaipa/Siapa pen Pasian a up a muanna khauhpai hi a kicih ding ut man lel tawh a kihangsansak kha om lo ding cih kigen thei lo hi.

Nung deuh-in biakna lam makai khat tung pan kammal khat ka za hi. Tua kammal hangin ka lungsim na mahmah a, hih lai ka gelh ding tua kammal in hong tawsawn hi kici thei hi. Tua biakna lam makaipa in bang gen hiam cih leh, nipi khat kikhawm thei kei leng nipi khat a kingah sehsuah le sumpi a tawm hi kei ven, kikhawm thei kei mawk leng sehsuah le sumpite pammaih ngel vem ci mawk hi.

Hih bang thute mah tawh kituakin namdang biakna makai pawlkhatte in a pawlpi mite uh biakinn zuat a hangsan nadingun hanthawn gawp thei uh hi.

Ngaihsut ding thu

Hih pulnatna tawh kisai-in biakna lam pan laigelhpa keimah mimal muhna hih bang ahi hi. Pasian upna muanna cih pen Laisiangtho sung ih et tak ciangin Laisiangtho sungah Pasian a um a muang taktak mite upna le muanna pen mihing lungsim hansanna tawh kalsuanna hi lo hi cih teltakin kimu thei hi.

Gentehna, Moses in Pasian um mahmah muang mahmah hi. Ahi zongin a mai ah tuipi a nung ah Egypt galkapte’n nungdelh ahih manin mabing cip dinmun a tun nangawn ciangin Pasian a upna tawh ci-in ama hoihsak lampi zuih ding le ama ngaihsutna tawh hangsantak-in khensat ziau ding cih lam zang lo hi. Nungkik thei lo mainawt thei lo dinmun nangawn ah Pasian a up a muamna tawh kihangsansak deksuai lo hi. A up a muan Pasian in a koi lam tawnsak ding cih thei lo ahih manin Topa tungah kiko masa hi.

Pasian in nung kik unla Egypt galkapte do masa un ci zaw ding maw, tuipi kantansak zaw ding cih pen Moses in thei lo hi. Pasian in a koi lam zuansak zaw ding cih Pasian hopihna aw a zak ma teng Pasian a up a muanna tawh a upna mawk zat lo hi.

Ka gen nop thu in Pasain upna le muanna tawh kalsuanna cih pen Pasian tung pan thupiakna/hopihna aw zakna om lo a mawk up mawk muan cih pen lungsim a hangsan mi mawkmawkte gamtatna tawh kilamdanna om lo thei hi.

Mi mawkmawk khat zong ama lungsim hangsanna tawh mawk gamtat leh siatna tuak den tuan lo hi. Tua siatna a thuak loh hunte khempeuh Pasian ka up ka muanna hang hi ci-in a kampi tawh Pasian paulap leh zong Tapidaw a kicite sung mahmah ah a um mi honpi khat om lai ding hi.

Pasian nasem pawlkhatte in Pasian a um a muang mite adingin hih natna pen lauh nading om lo hi ci uh hi. Hong kilawh ding ka leu kei hi, hong kilawh zongin bang mah ka ci kei ding hi ci uh hi. Hi mah hi. Pasian a um a muang taktakte adingin lauh nading om lo mah hi.

Ahi zongin tua bang a ci mi pawlkhatte in amau tung pan midangte a lawh sawn khak ding uh khualna nei lo uh hi. Amau bangin upna a khauhpai zo lo a zi a tate uh le a kinaipih a mipih a kithuahpih midangte a nat lawh a dahsak lawh khak ding ngaihsutna nei kha lo thei uh ahih manin kong it ka zomipihte aw, muh theih na pumpi a nat a sat ding hong khual lo mi khat in muh thei loh na kha hong khual manin na lungsim a hangsan nadingin tha hong piak leh limtakin thu ngaihsun in ci-in kong vaikhak nuam hi.

Tua bek tham loin biakinn sung bek ah Pasian a om bangin hih bang hun sia kawmkal sungah biakinn tun loh phamawh bangin thu hong gen mi a on khak leh tua bang thu a gen mite tungah mun khempeuh ah na Pasian om ahih lam limtakin hilhcianna neihpih kik zaw in. Pasian pen up ding muan ding hi a, ahi zongin aman bang hong gen a bang hih dingin hong sawl cih a thei lo upna le muanna pen lungsim upmawh hansanna hi lel kha thei hi.

Egypt gam ah gimna a tun lai-in ganhing le singkung lopate ading gimna a tun zawh ciangin mihingte tungah natna bek ahi lo sihna a tun ding hun, ta masapen thah ding hun a tun ciangin Pasian in ami Israel-te tungah innkongkhak tungah tuu si tat unla tua zawh ciangin na ut bangin om un, kei hong um peuh le uh cin na tate uh kong thahsak kei ding hi ci dwksuai lo hi. Tuu si kongkhak ah zut khit ciangin inn sungah om ding ci hi.

Laisiangtho sungah biakinn sungah thungen a Pasian tawh kizop hun a omsak mah bangin gamdaihna inn sungtawng ah gamdaitaka thunget hun zong om hi cih kimu thei hi. Topa Jesu mahmah zong a sih ding kuan ciangin a lungkhan mahmah a, ahi zongin biakinn zuanin thungen lo hi. Gamdaihna mun, midangte om lohna mun mualtung ah a Pa Pasian tawh kizopna nei hi.

Laigelhpa kei pen leitung thu/Pasian thu lamte ah pilna siamna lam tawh kisai min le pahtawina ka ngah khat zong om lo ahih manin hih ka thu gente pen laisimte ngaihsutna tawh kituak khin ding ka ci ngam kei hi. Tua ahih manin na ngaihsutna tawh kituak lo ahih leh zong hehna le thanemna lamin nong kaihsak loh ding le mi mawkmawk khat ngaihsutna hi lel hi ci-in nong pomsak dingin kong thum nuam hi. (Um nakisakna tawmkhat khiam inla na thunget tawmkhat khan zaw in!) Lungdam, Job Cinpi (Zomi laisim nuamte)