Tulaitak a honglaang pulnatna Khristian te’n koici doding ~ Rev. Dr. Pau Khan En

Tulaitak a honglaang pulnatna Khristian te’n koici doding ~ Rev. Dr. Pau Khan En

Tulaitak a honglaang pulnatna Khristian te’n koici doding (How to Deal with Current Pandemic as Christians) ~ Rev. Dr. Pau Khan En

Tulaitak-a leitungbup ah a laang (Coronavirus – Covid 19) lau in gam neuneute tham lo, gam lianpipi te zong dipkua-in Sang, nasepna leh sumzuak sum leinate khakcip in nasep khempeuh dinkhawl hiau uh hi. Ani ni-in gam lianpipite nangawn ah a si, a sawm a za in kibehlap toto den hi. Hi banga leitungbup pulpi (pandemic) hongtun laitak-in Pasian thu-um Khristiante koici om dinga, koici do ding ihi hiam? cih i ngaihsut ding, cih thunga konggen nuam hi.

I. CIIMNA TAWH NUNTAKNA (Living Wisely and Carefully)

Hibang leitungbup patauh dipkuat hun laitak-in thu-um Khristiante pilvangtak-in i om ding kisam hi. I pumpi tungah hih natna hongtun loh nadingin ei mahmah siantho nading leh kiim leh paam siantho nading pilvangtak leh ciimtak-a i nuntak ding kisam masa pen hi.

II. THU MANNA (Obedience)

Hih pulnatna hongtun ciangin a gamgam ah kumpite lunghimawh in, cidamna lamte in “zuih ding leh pelh ding” (dos and donts) mikim’ theih dingin hong suaksak, hong phawngphawng den uh hi. Tuate dongdong sese lo-in thumangin zuihpah seppah ding ahi hi. Khristian hoihte in cidamna lamte hong taangko leh sawlnate i mansuk pahpah ding ahi hi.

III. THUNGEN NILOH NI (Living in Constant Prayer)

I biak Pasian pen ‘Damna Pasian’ Jehovah Rapha ahi hi (Pai. 15:26). Mihingte’ thuaklah haksatna khempeuh hong bawlphatsak hi. Israel mite-in kumtawn khatawn a, a thuak uh tui hoih lo pen ci tawm khat tua tuinak ah a khahziau ciangin nautolh om nawmlo-in, a leitang uh zong hoih a, munnuampi suak hi (2 Kumpi 2:20).

I anneek i tuidawnte ah Topa in hong ompih in Ama mite tung panin natnate khempeuh hong lakkhiatsak ding hi (Pai. 23:25; Thuhilhkikna 7:15). Tuabang Pasian nei ihih manin Ama tungah ei’ ading thu i ngen ding hi. Leitung mi khempeuh adingin zong thu i ngen ding hi. I mawhnate kisikkik, kipuah pha-in thu i ngen ding hi. Ko Pasian nasem Sia, Siamahte in thu kong ngetsaksak uh hi.

IV. VENG LEH PAM KHUAL NI (Living in Social Concern)

Hibang leitungbup pulnatna hongtun laitak-in i kiim i pam ah a cimawh zawdiak om thei hi. Pasian bawl mihing ahih lam phawk-in ihih thei bangbangin huh ni. Tua in, tualaitak-a Pasian hong hilhnop Khristiante’ tatzia heekzia ding ahi hi (Matt. 25:14-46)

V. KHRISTIANTE’ DO DAN

(Christian Attitude towards the Pandemic) – Hih leitungbup pulnatna a laan sungin Khristiante pilvangtak-in kumpite’ thu cihte man ding ahi hi. Laulua-in dipkuat luat ding zong hilo hi. Banghang hiam cih leh, hih pulnatna pan Pasian’ theih loh kal a, a piang hilo hi (Late 121, 91).

I telzawh nailoh Pasian ngeina leh deihna khat om ngelngel ding hi. I thunget ding pen, Topa aw, bangtan vei thuaklai ding ka hi uh hiam? ci-in upna leh lungduaina tawh Topa dongin tha i laak ding ahi hi (Late 13:1-2). Nikhat ni teitei teh Pasian in Ama deihna hong kilangkhiasak ding hi. Tuamatengin upna tawh nungta ciat ni.

Hih natna a thuak leh a lauthawng lei mi khempeuh tungah Pasian’ itna leh damsakna hih lauthawng hun sungah a thak-in hong tungta hen! Tuabang mahin, cina gim ngahte’ ading a vaihawm leitung kumpite khempeuh tung leh itna tawh acing akeem Siavuan (doctors), Syamah (nurses) te tungah Pasian vangliatna a thak-in hong tungta hen! Rev. Dr. S. Pau Khan En