Pu Go Za Pau (kum 80, Dopmul beh) in USA, Charlotte khuapi pan hongnusia

Dahna Pulakna (Condolence Letter) | Mangpha Pu Go Za Pau, Kum 80 (Dopmul beh)

USA gam, North Carolina, Charlotte khuapi a teng Pu Go Za Pau, Kum 80 (Dopmul beh) in abeisa December 01, 2017 ni-in damlohna hangtawh atenna Charlotte khuapi panin mual ong liapsanta cihthu ih zakmanin Zomi Innkuan USA kipawlna in nakpitakin kidahpih, ki lainatpih hi.

Pu Go Za Pau te innkuan pen leitung nuntak khuasakna anuamzawding lunggulhnatawh abeisa 2015 kum in USA ong tung uh ahihi. Pu Go Za Pau pen USA gamsunga ong nusia Zomi sanggam laizom khat hihnatawh dahpihna lainatpihna lahna in Zomi Innkuan USA kipawlna in Pakkual khattawh mangpha khakna kinei ding hi.

Pu Pau tawh a nunugnpen hunzatkhopding pen ong tungding December 9, 2017 (Saturday) ni-in Rhema AG pawlpite ngeinatawh kituakin Rev. Thang Lian Kap makaihnatawh anunugnpen hehnep hunbawlna kineidinga tuakhitciangin hanmualah daitansakna/vuina kinei dinghi.

More: Dahpihna leh Phawkna laikhak pawlkhat ~ Rev. Khup Za Go

I it mahmah Pu Go Za Pau ong nusiatna hanga adah akap, alungleng khuangai a innkuanpih atu ata, khuapih tuipih, tanau meltheih, behlehphung khempeuh tungah I biak vanglian Pasian kiangpana ongpai khasiangtho hehnepna bukim ong tung henla lungnop tawldamna ongguan kimtek tahen cih Zomi innkuan USA kipawlna in thu kingetpih hi.

Dahpihna Lianpitawh,
Tg, Kai Lam Thang

Secretary of Genvai
Zomi Innkuan USA, Inc.

Tulsa, OK,
December 08, 2017