GZA: Zomi Makaipi Pu Go Sawm Khup tawh kimuhkhopna

GZA: Zomi Makaipi Pu Go Sawm Khup tawh kimuhkhopna

February 17, Yangon :: GZA pan vaihawmna tawh Zomi Innkuan USA (ZIUSA) Board Secretary le Leitungbup Zomi Innkuan (LZI) Pawllutang Pu Go Sawm Khup tawh kimukhopna tuni nitak lam in City Star Hotel ah nuamtak in kibawl thei a GZA, ZCD, ZYA-Ygn, Siamsin (ZSK-Ygn) te pan kihel thei uh hi.

Kimuhkhopna ah; Pu Go Sawm Khup in 1988 Gambup Lungphona hunlai Siamsin makai a sepna, Galkap Kumpi dokhiatna nasepna te ah a tuahkhak thute le tulaitak Siamsin te tung ah deihsakna te genna nei hi. Abeisa Zomi te kalsuanzia, tuahkhak thute le Zogam Zomi vai muhna te dotna le dawnna te nuam tak in kinei thei hi.

Pu Go Sawm Khup ii Thapiakna Kammal pawl khat: (tom lak kikna)

“Tulaitak Siamsin hikik thei ding hi leng, ka sang class khempeuh khat zong pelh lo in kah sawm ing. Sang pan hong kisin sak Pilna khempeuh a vekpi in ka ngah ma tang sin sawm ing. Abeisa Galkap hun sung Kawlgam Pilsinna lam ah thanemna om hi mah taleh, tuhun ciang hong hoih kik mahmah ta hi ci in mu ing. Tuni ii Sang te a hong kihilh Pilna te pen International Standard ahih lam phawk huai hi.”

“Siamsin cih pen khangnote, a lungsim siangtho te hi a, tulai gamvai minam vai, party vai te ah koi mah ah bias lo in neutral in om theih ding thupi sa ing”

“Mikang gam te in SWOT ci in ei-le-ei kisittel kikna, thahatnate, thanemna te a lungngaih kik uh kum tampi na sawt khin ta hi. Tukum 2018 zong Zomi sung ah ei le ei kisittel kikna a kua maciat in I bawl theih ding lunggulhna nei ing.”

Mapangkhawm in Semkhia ding:

Tuni kimuhkhopna pan in Zogam Zomi te ading mit tawh muh theih nasepkhopna khat teitei sepkhiatzawh nading thukimna nei uh. Zogam hong nosuah kik na ding in tukum 2018 sungin Zogam ah Singkung suan nasepkhop theihna ding GZA, LZI, ZCD,ZIUSA, ZYA, ZSK (Siamsin) le a lunglut kipawlna te mapang khawm ding le kithuzak toto ding in kithukim hi.

Mailam ah

Zomi sung ah pilsinna lamsang ah ‘laihanciam mahmah a, akisam mahmah te’ panpih theihna ding, Gam tuamtuam ah om Zomi Siamsin te kimuhkhopna, exchange program te vai hawm zawh nading te zong hamciam khop ding thukimna nei uh hi. Kawlgam, Vaigam, Tuipigaal a om Zomi te kipumkhat kik in “Zogam” ading mapang khop ciat nading lunggulhna pulakna te nei uh hi.

Makaipi Pu Go Sawm Khup pen Malaysia Kuala Lampur ah ZAM makaihna tawh kibawl ding Kum 70 cin Zomi Nam Ni bawlna ah zingmangpi ding in hong ciah sungin, Inn lam a om mipih te tawh kimukhawm ding in Zogam hong ciah ahi hi. GZA info