President Trump in Muslim gam 7 pan lutsaklohding athupiak US Court in dalleuleu

President Trump in Muslim gam 7 pan lutsaklohding athupiak US Court in dalleuleu

Fed. 10, 2017: Trump in Muslim gam sagih panin gambeelte leh galtaite a lut sakna lohna ding a thupiak US federal appeals court in dal a, San Francisco pansal 9th US Circuit Court of Appeals sitni (judges) thum in zan in Trump in gambeelte a lutsak lohna ding dal in, US gam-a gambeel lut ding kiphal lote kilutsak sak kik ding hi ci-in ci-in pulak hi.

Hih thu hangin Trump thangpai mahmah a, a Twitter ah, ” Laimal gol (capital letters) in, ” US bitna ding no khut sungah om hi,” cih tuangsak velval hi. Trump in Trump administration lente kiangah hih dalna a om hangin kizo veve dinga, politics kimawlna hang bek bekin a dal uh hi ci hi.

Trump in January 27 in Iran, Iraq, Libya, Somalia, Sudan, Syria leh Yemen gam panin gambeelte ni 90 sung lutsak loh ding leh Syria panin gambeelte hunciam om loin lutsak loh ding hi ci-in executive order suai na kai a, hih pen US gam Islamic ngongtat ten a suamna ding uh dalna hi na ci hi. Ahih hangin Trump in sitni ten a thupiak a dal manin Trump in sitnite nakpi takin mawhpaih a, Trump in conservative judge len dingin a min a pulak Republican Senate Gorsuch nangawn in, “Sitni puansilhte khat mawpaihna zong US gam bup a sitni khempeuh mawhpaih na hi,” ci-in Trump’ thupiak na langpang hi.

Seattle a District Judge len James Robart in Trump thupiak Washington leh Minnesoto sitni ten a dal manin Seattle in zong gambeeelte February 4 panin kilutsak kik hi ci hi.

Trump in US President a let khit nung amasa pen pen dingin galkap zangin Yemen gamah al-Qaeda ngongtatte lei galkap zang in galdo dingin a sawlna ah US Navy SEAL galkap khat a sih banah thum in liamna tuak a, a vanleng zat uh $75 million bawh khial in, a kisiat manin amau party mah ahi leh US President tuh ngei John Mc Cain in hih operation pen lawhsapna hi zaw hi a cih manin Trump thangpai mahmah a, “John Mc Cain lawhsam den ahih manin gualzawhna leh lawhsapna khentel thei loin na khempeuh lawhsapna vive in ngaihsun a, US Navy SEAL galkap khat si in, vanleng khat a siat hangin a operation uh lawhcing in, al-Qaeda makai a kithat banah a galkapte uh tampi kithat hi ci hi”. Source: Al Jazeera and news agencies and The Hindu/ Thang Khan Lian