Pope Francis leh AirAsia Company neipa kimuhkhopna neita

Pope Francis leh AirAsia Company neipa kimuhkhopna neita

AirAsia Company neipa ahi Tan Sri Tony Fernandes leh Pope Francis te tuni Sunday ni in Vatican ah kimuhkhopna neithei uhhi. Tony Fernandes in Pope Francis kiangah thungetsakding in alunggulhna genkhia a, tua in banghiam cihleh Malaysia gamsung ah minam tuamtuam te khatlehkhat ki it in, gamhoih ahihtheih nading in asepkhop diamdiam theihnading uh thungetna ah helsakding in ngetna nei cih theStar pan kiza hi.

Tony Fernandes pen mihau, mi minthangkhat ahih mahbang in leitung mi minthang tampi tawh kimu zelzel hi. Ama ii genna ah leitung gammakai, kumpi leh Celebrities tuamtuam tetawh kakimu ngei a, tuateng lakaah Pope Francis pen lamdangdiak hi ci’n genkhia hi. Tuaban ah Pope Francis tawh kaki muhtheihpen kapa lungdam mahmahding hi ci’n genkhia hi.

Pope Francis in Business Leaders te’n kipawlna Society te tungah kilamdanna apiangsak theite hi uhteh cih thapiakna hongnei ci a, tuaban ah nahoih sepsuakding pen lawpna hongguan mahmah cihi.

Pope Francis in kamit hongvangsak a, thathak hongguat banah nahoih sepsuaksuakding thahatna tampi hongguan ci’n genkhia hi. ZD Sawltak

AirAsia Company neipa ahi Tan Sri Tony Fernandes leh Pope Francis te hongtungding Saturday niciang in ki muhkhopna neiding uh cih theStar panin kiza hi. Tan Sri Tony Fernandes inzong Pope Francis tawh aki muhkhopding vai uh ama ii Facebook tungah suaksak hi.

Alianbel Siampipa tawh kimuding kahih manin bang genleng hoihding hiam? Bang ngenleng hoihding hiam ci’n ama ii Facebook tungpan in Followers te kiangah Idea ngetna khat tuni Monday ni in Post khia hi.

Tan Sri Tony Fernandes in Pope Francis tawh aki muhkhopna ahang taktak pen gelhkhialo a, ahi zongin Pope Francis tawh kimuh khopding pen ama adingin athupi mahmahkhat ahihlam genkhia hi.

Ka nuntaksung tuciangciang mi tampi tawh kaki mukhin hi. Ahi zongin tutung Pope Francis tawh kimuhding pen thupidiak khading hi ci’n genkhia hi.

Tuaban ah Vatican zong ka zinngei naikei ci a, tutung zintheileh azincilna hipah dinghi.

AirAsia Company neipa Tony Fernandes ii aminpi taktakpen “Anthony Francis Tony Fernandes” ahihi. 30 April 1964 ni in Kuala Lumpur khuasung ah suak a, ahi zongin Malacca khuapi panin khangkhiazaw hi. Tu’n kum 52 phakhinpan a, ahi zongin Malaysian Entrepreneur minthang mahmahkhat hita hi.

Malaysia gamsung ah Budget Airline ci’n sum tampipi piakkul seselo in vanleng tuanzawh nadingin hongvaikhawmkhia a, tu’n AirAsia pen leitung gamtuamtuam ah ki limzat mahmah hi. “Now everyone can fly” cih Tagline tawh AirAsia pen mikhempeuh atuanzawhding in ageel ahihi.

More: Malaysia ah naupang deihdandan kileithei cizen veh aw

Aneulai in mihau innkuan pan akhangkhia hihetlo hi. Nektawmzong in hongki pankhia geigei himah leh tu’n Tony Fernandes pen Malaysia gamsung ah mihau penpente lakah khatin kihelta hi. ZD Sawltak #zomidaily