Politics Party vai ah etteh huai kasak

Politics Party vai ah etteh huai kasak

Hih a tunga I gen Party vai pen a puasiamlo or a puazolo mite sungah khat le khat ki thahna, innkuansung, behsung, biakna pawlpisung, khuasung, kipawlnasung leh a tuamtuam ah ki khenna, kituam neihna, ki tuam muhna, ki tuambawlna leh ki muanmawh na cih bang dan a tuamtuam piangthei hi.

I mipih pawlkhatte pau leh tulaitak Australia kumpi asem Tony Abott langkhat ah Opposition Party (eipau in langpang Party I ci maidiam) makai khat in a sanggamnu ki hel in kumpite tungah a lungkim loh na uh aom leh ka sanggampa makaihna hi, cituanse lo-in gen ziahziah lel in a sanggam pa pawltuan, panpih tuan hetlo hi. Kawlgam sunga om mi pawlkhatte bang hi leh thu ki zakna panin hih ka sanggamnu ka sanggam panin, ka beh ka phung sung panun ka hawlkhia uh hi, cih khawng thuak khathei maiding hi. I sanggam Mizo te tawmcik enpak leng I theihsa tek mah bangin Pu. Zoram Thanga leh Pu. Lalthanhrawl a Party uh ki banglo hi. Kitel kuanteh a gualzo ding ki demden uh hi. A gualzo penpen in ahih theihtawp suah in Mizoram mah puah uh hi. Manipur Lamka kim aom I mipihte zong,hun khatlai kitel kuanteh thusia, lasia tuamtuam tampi piangthei zel in makai muanhuai a sihlawh zong om ngei hi. Tu hunteh tuaci bang thu ki za nawnlo mai hi.

Ei Kawlgalkap ukcipna nuai a, ompawl zong Mee(vote) khiat kuanteh I pilvang ngelkei leh I kim I pam a te’n ei le ei uino suktuah in hong sutuah lel dinguh a, athuak pen, asumh pen ei mah I hilel ding hi. Amau mun khat panin hong nuihsan hiuhiau lel ding uh hi. I gentehna in tukum kitel kuanteh sanggam Phunom Khua panin mi nih in MP tuhding cih thu kiza hi. Khat in USDP khat in Chin Party lam hih tuak hi. Sanggam pawlkhat te’n “ei Khuano mite nih MP dingthei ding, minih I om manin lungdam mahmah hang, Mee khiaciatni,” ci hi. Khat in bel Mee tam ngahzaw ding cih theihsa hi-a, a tawm ngahzaw penin bang, a ngaihsun tam? Cih ki theilo hi. A tamngahzaw pen in zong CHIN STATE Level in hong ngahzo diam, ahih kei leh Township Level ciang beek e, ngaihsut tak mahmah hi. Mun min khawng minam min asa kitam mahmahlai ahih manin minam makai adiak in Politician taktakte’ a ngaihsut uh tam mahmah ding hi. A semthei taktaklo dingpi leh mi namdangte mai ah thu kician a genngam taktaklo dingpi, makai khawng pum utciat in I ki khen zelzul mawk leh bel I guallel pahdiam lel ding hi.

A semthei taktak ding te’n zong mipi lungsim a zawh uh hong kul zel ding ahih manin hong baihlua hetlo ding na hizel hi. Bang hang hiam cih leh Mee piading a tamzaw te’n kalsim, khasim thu ki zakna a tamsim omlo zaw ban-ah Radio,TV, INTERNET zong limtak enman, ngaimanlo ding uh hi. Nisim in tu le hei tawh gamvak, luivak in buaizaw khading uha, muhpak neekpak ding pen amau ading in a thupi pen hong hiding hi. Kuan pen muanhuaizaw ding, minam itzaw ding hiam, cih zong tam theihlolai ding uha, a kiangua, a aw ngaihzawzaw, a mutzo zawzaw, mehteh, mehgah, anteh, theipuan a kholhzo zawzaw Mee(vote) apia honpi khat zong omkha ding hi. Tua ahih manin a gualzo nuam Party peuhmah mawktut hithiat cih omtheilo in MEDIA ahat mahmah, thugen asiam mahmah uh akul ding ban-ah Sum le pai zong a beizek hong kullai ding hi.

Hun khatlai Zogam saklam Guite kual lam-a, Mee(vote) zong pawlkhat in singtang khote kiangah “Vanleng(Helicopter) tawh Zawngtah honglo sakding hi ung, lo sing zong, phukkul, vatkul nawnlo ding” acih dan khawng uh, tu hunteh ciamnuihna in pawlkhat in I zat mawkhang in mihing pen thupi I sak dan ki bang hetlo ahih manin Mee(vote) zong or thu gente in a mi leh amun zui in thu agen theih uh leh mipi lungsim zoding uha, gualzo ding uh cih hong phawksak hi.

I gennop bulpi in ahih leh kitel kuanteh ei le ei sisan naisan khawng I kisuah khak loh ding ban-ah I innkuansung, I khuasung, I ki pawlnasung I buaisak khak loh ding, I ki khen khak loh ding, I ki nuaksan khak loh ding hong thupi mahmah ding hi. Tuaci bang hong piankhak loh nading in ahun hong tunma in kiging ciatni. Ei hong langpang lote I gal hilo a, hong langpang I cih te zong, I manawt zawk nang, I minthang nang, pilna I ngah beh nang leh I khantoh zawk nading kongvang hong hon’ sak zong hithei hi.

Khaibawi