Politics leh Siipuayii ~ Pau Khat Suan

Politics leh Siipuayii ~ Pau Khat Suan

Ommuan ngaihsutkhak maimai thu khat.. public interest vs personal interest… Zomite in sumhaute makai ding in i lam-en pahpah a, kipawlna leh pawlpite ah upa madawk in i koih pahpah hi.

A taktak in kipawlna leh politics i cihte mipi’ vai ( public interest ) hi a, pawlpi cih pen Pasian’ thu sung a thu-um mipi’ vai neihkhopna ( public interest namkhat mah ) hi veve hi.

Sum hau, sumbawl siam, Siipuayii tama i cihte amau’ siamna leh kivakna pen mimal vai, mimal interest ahi hi. Siipuayii tamate in public interest pen awlmawh lo ding cihna ahihpah loh hang, personal interest pen amau’ ading in masa zaw den hi.

Sum zongte in sum mah thupi sa uh a, pilna zongte in pilna mah thupi sa uh hi. A hiding mah hi. Sum zong in sum thupi sakei leh sum zonna vet a omlo hi a, pilna zong pilna sin kimlai pilna thupi sakei mawk leh asin pilna a mawkna hi in, ma tunlo ding a, a zo phial zong in a ngah pilna bangmah in kimangthei lo ding hi. Biakna nasem siate leh upate in Pasian’ thu, vantung thu sang leitung thu, leitung vaite thupi ong sakmawk ciang lawhcinna kibungbutun thei hi.

Mimal vai nasepna leh maban peuhmah ah mimal vai ( personal interest ) mah thupi ngaihsut a masak ding hi a, mipi tawh kisai kipawlna leh pawlpi management peuhmah ah mipi’ vai ( public interest ) masak ding ahi hi.

Mimal vai a masak den khat mipi’ vai ah ma pangsak in, mipi’ vai sang ama’ mimal vai ong masak denkeei mawk leh i maban kisongsawlawi pah ding cihna ahi hi. Mipi in zong tuate’ tungpan lam-etna lianpi i neih masak loh ding thupi ding hi.

Makai i cih in ama’ mimal vai vaihawm ding hilo a, mipi vai vaihawm ding ahi hi. Politician i cih in economist hilo a, economist hihding zong kisam lo hi. Ahih hang, politics lampi tawn a, siipuayii tamate’ nasep theihna a hoih zawsem a hihna ding a lampi honsak ding ahi hi. Tua pen politiciante’ nasep hi. Amah mah summet bawl, lei leh zuak a diang zakzak ding hilo hi.

I dinmun leh i siiksan, i mapanna ciatciat pan Public interest leh Personal interest i khen siam ding thupi a, kuate koi mun ah cih leh koimun ah om kahiam cih i theihtel ding thupi ding hi.

Notes:
AungSan in ama’ personal interest khempeuh nusia in gambup ( public ) interest masakna tawh Kawlgam suahtakna lakpih a, Newin in gambup ( public ) interest khempeuh ama’ mimal ( personal ) interest a zatna tawh leitung a gam zawngpen ( LDC ) dinmun tunpih hi. Pau Khat Suan