Pilna leh Siamna ah Zomi te ~ NK Nang

Pilna leh Siamna ah Zomi te ~ NK Nang

Zogam ah ih tenzawh AD 1300 kimpan 1900 dong Kum 600 sung pen Limlai (Pictorial writing) kizang a, mual suang tungah Sai lim, Sahang lim, Saza a kipan lim tampi kigelh hi.

Zogam ah British Empire Army te hong tung a, Missionary te a sawtlo in hong tung uh hi. Mangkang galkap te leh Missionary te in lai tawh a kep te uh pen Zomi te tangthu muh masa te hipah hi. Tua hun akipanin MangTuallai a kici A Aw B Ch na sin uh a, mi masa te min zong Chin Sian Thang, Chin Do Kham, etc te in a certificate ah a kigelh bangin zang suak uhhi.

1900-1980 kikal pen tan 4 sin dingin khua dang tangvalpipi te zong Sangkah uhhi. laitan nei leh siamna nei mi tawm mahmah hihang. Tua hun a, tan 4 zo te, tan 7 zo tampi in Kumpi nasem uh a, Party Council leh a tuamtuam makai in Kizang uhhi.

1980-1990 kikal in Mang laisang (Middile School) kah dingin khua Lianpian te ah kikah a, tan 8 ong zong ki thupi ngaihsut mahmah hi. Banghanghiam cih leh tan 8 zong kumpi laivuan (board exam) ahihmanin tan 8 ong zolo mi tampi om a, tan 8 ong zong mi tampi om ta hi. Kumpi nasem ah Zomi te tampi tak kihel ta hi.

1990-2000 kikal kum 10 sung pen gamsung ki-ukna hoihlo lua ahihmanin tan 10 ong lo tam mahmah a, tan 10 te zong khasum tawm lua ahihmanin kumpi nasem a lut mi tawm mahmah hi. Tan 10 ong a tamzaw in college/University zomlo in sumzong khualzin leh Laisiangtho sangkah a, Sangnaupang te mun tuamtuam ah kithehthang gawp hi. B.A, M.A leh Degree a ngah a tamzaw in kumpi nasep lam sangin gamdang leh a tuamtuam ah khuadak tek zaw uhhi.

2000-2010 kikal in boarding school hoih tampi ah mi tampi lut uh a, tan 10 sin tampi om hi. Gamdang ah mi a lompi in a kipai hun sung ahihmanin High School, College/University a kah tawm mahmah hi. Sangkah sunsun te kumpi nasep lam lut kik pian ta hi.

2010-2020 kikal sungin Kawlgam Khuahun pen Democracy mel a muh ciangin sangkah ki thupi sak mahmah a, tan 10 zo te in College/University zomto suak in kumpi nasep ki lunglut mahmah ta hi. Zogam leh Kawlgam ah Zomi te kumpi nasem tampi tak om ta hi. Zogam ah Construction lamah a lunglut mi tampi om a, sum tampi tawh Zogam ah nasem company tampi om ta hi.

Tuhun ciangin Zogam ah Construction, Bank, Private Bording School, Private Hospital, Agriculture, gankhawi leh NGO te akipan nasepna tampi kimu hi.

Zogam ah vaihawm dingin Zomi te ngiat in Party tuamtuam ah kuanglui a, Zomi Minister Tonzang Myone pan MP-4 leh Tedim myone pan MP -5 a vek in MP 9 kinei ta hi. Officer leh department a nasem Zomi te tampi kipha ta hi.

Pasian hehpihna tawh pilna leh siamna tawh nasepna thupi mahmah a, nasep ngah haksa mahmah ta hi. Zogam pen sumhau te leh thatang hat te in thu mawk neih gawp nawnlo ding a, nekguk (corruption) na leh thumanlo a kimawl gup gawpna bei ta dinghi.

Zomi sungah ih muan mahmah mipil leh misiam te in Itna leh deihsakna tawh thuman takin gamsung vaihawm ta ding uh a, Zogam pallun ta dinghi. NK. Nang