Pil vai mahmah hi ~ Zomi Quavadis

Pil vai mahmah hi ~ Zomi Quavadis

ZAM ah ka sep laiin Dr. Do Suan Mung ong hawh a, nitaak an ka neekpih uh hi. Ken pen Sia Mungtawng bek a mel ka muh ngei nailoh hangin a min ka za ngei hi. Lawmte’n a thei khin ding hong sa uh hiding hiven kuamah in hong gen lo uh a, ken zong kuamah ka dong kei se vial hi. Siapipa khiangah, “Sia aw, nang pen Sia Mungtawng a cihpen na hia?” ka cih leh, aman hong dawngkik pah a, “Hi keng, tua nong dot pen Full Gospel a Sia Mungtawng hi. Kei bel Do Suan Mung hi ingh. Ka min uh Mung tuak ahihmanin hong kitelkhial thei zel mah hi” hong ci hi. Heh het loin kitel takin hong gen hi. Kei-leh-kei hai ka kisa a, Dr. Do Suan Mung pen a pil lam ka tel semsem hi.

Khatvei laigelh a uuk mawh lo, siam ka sak mawh loh khatin thuthang a gelhna ah Bishop Felix Lian Khen Thang pen Sia Felix Lian Khen Thang ciin gelh mawk hi. Hih tawh kisaiin Rev. Fr. Robert Kam Hau in a gen ngei thu ka za a, ka ciamteh hi. “Khatvei pastor khat in, ‘Sia, dam maw’ hong ciin a khut taklam hong khaak hi. Ken zong a khut ka letsak kawmin ‘Kei sia hi lo, Father hi ingh, ei Zokam in Topa ciin hong kisam hi’ ciin ka dawng hi” ci hi.

Laigelh siam ka sakpa leh pastor pa tawh ka kibatna uh khat om a, tua pen thu ka kan masak lohna uh ahihi.

RC makaipite sungah min (titles) kilawhdan a tuamtuam om hi.

• 1. Pope (Holy Father/ His or Your Holiness)
• 2. Cardinal (….)
• 3. Archbishop ( His/Your grace)
• 4. Bishop (His/ your excellency)
• 5. Auxiliary bishop…
• 6. Monsignor
• 7. Priest (Father/Reverend)
• 8. Deacon
• 9. Brothers & Sisters
• 10. Thuhilh sia/Sia/ Catechist…

cihdanin om suk diudeu hi. A vekun SIA ciin kisam thei lo uh hi. A 10 na bek SIA ciin kisam thei hi.

Sanggam Protestant sungah ahileh Evan, Sia, Pastor, Rev. cih danin om sam napi a vekun SIA ciin kisam lel uh hi. Hih kilawhna pen sanggam Protestant sungah piang thei a, Catholic Pawlpi sungah ahileh piang thei ngiat lo hi.

Ih kilawh ih kisapnate thupi a, ih kitheihpih a ih kizahtaak sak ciat ding kisam bek hilo in pil vai mahmah hi. Zomi Quavadis