Pianpih Pau tawh Pasian Biak

Pianpih Pau tawh Pasian Biak

Pianpih pau tawh Pasian biak pen Pasian in hong bawl bang liana Amah biakna hi a, mihing nuntak ngeina (human right) tawh kituaka gamtatna nam khat ahi hi. Leitung minam liante, amau minam bek in Pasian a biak uh ciangin, midangte’pau kawm lo uh hi. Minamdangte lak, leh a mission nasepna uhah bel, a kul leh, a omna gam uh a pau tualleng a zatpih uh hi.

Mihing a bawl Pasian in leitunga pau tuamtuam a om lamtak theiin, kuama pau simmawhsak loin, tua pau tuamtuamte kiangah ‘ lungdamna thu’ puak dingin a mite a sawl hi (Mat. 28:19 ; Mang. 14 : 6). Tua awh kizuiin, mission nasepna a thulet bulpite laka khat in, Pasian thu a thei nailote kiangah, ama pau tawh lungdamna thu (gospel) hilh ding” cih ahi hi. William ‘Carey in West Bengal ah missionnasep hong kipat laiiin, India gam pau sinin,India mite pau tawh Lai Siangtho bu theikhatsak a, Tu khanga mission nasepna makaipa ( Father of Modern Mission) cih pahtawina ngahlawh liang hi. India Evangelical Mission nuaiah state secretary nasep ka let sung (2000 – 20006) in makaite in, “Minam khatpeuh, ama’pau leh a ngeina (culture) simmawhsak loh ding” cih hong lim gen mahmah uh hi. Topa Jesu zong, Ama mipih Judahte kiangah pai masa a (Joh. 1 :11), a mission nasepna ah zong ama minamte thudon masa hi ( Mat. 15:24-28)

Kum 1992 kumin Washington DC kici Americae khuapi ah khualakah ka vak ciangin, Nipini in tua khuapi sunga minam lian pipi – Sen (Chinese) te, Russiate, South Koreate, Tamilte in amau minamte’ biak kikhopna mun hong zuan ziahziah uh hi. Hihte in America pau zang lo a, amau pianpih pau tawh Pasian a biak, America kumpi in a thih hangin phamawh a sa sese kei hi. Minam kisimmawhna gamah tua banmgin om hi leh. ‘A kihuih tuam nuam hi. Kumpi langpang hi. Minam kipumkhatna susia hi,” a ci om kha ngel ding hi. I sanggam Mizote zong, koi gam koi gamah om tase le uh, a omna gamte pau pen khualakah zang lel uh a, biak kikhopna ah amau pianpih pau ngiat tawh Pasian bia tangtang uh a; kuamah in kumpi langpangina ngaihsun tuankei uh hi. Bnag hang hiam cih leh, ei pianpih pau tawh Pasian biakpen Human firgt lehIndia gama fundamental rigfht tawh a kituaka gamtatna man khat ahi hi.

Kum 2000 khit ciangin Mizogam sunga pau tuamtuamte in zong khuaphawk pianpian ta uh a, Pawlpi taumtam sunga pau taumtuam zangte in, amau pau tawh Pasian a bia thei ta uh hi. Bru Baptist churchte in Bru (Tuikuk) pau tawh, EFCI te in Hmar pau tawh, ECM te in Mara(lakher) pau tawh,Baptist dunga Laite in Lai (Pawi) pau tawh, ZBC leh EBC te in Zopau tawh, Nepali te in Nepali (Gorkha) pau tawh Pasian a bia thei uh hi. Pawlpi lian sunga Aomi a tam zawte in mi’ pau tawh Pasian biak pen ahi ding mah sain nuamsa lel uh a, tuate laka pawlkhat in ei pau tawh Pasian a biate simmawh-in zumpih-in langpan ngam lai tazen uh a, dahhuai-in zumhuai mahmah hi.

Neek leh taak haksatna hangin Zomite gam tuamtuamah sial-ek deen keek a gen uh bangin i kikhenzak hangin, Pasian inhong nusia lo a, i omna gam tekah i Zopau leh i Zo ngeina khahsuah zawm loin, Zomi min tawh kipawlna tuamtuam – ‘Zomi Innkuan’ Zomi Christian fellowhip’ ci-in mipihte in kizopna kinei kawikawi hi. Kolkata, New Delhi,Chennai, Bangalore, Mumbai, Guwahati, Japan, Malaysia, Thailang, Australia, Germany, USA, Norway, Hong Kong leh Singapore ah ‘Zomi Christian Fellowship’ min tawh ei pau a Pasian biakna om kawikawi hi.

Tedim Lai Siangtho pen United Bible Societies, Bible Society of India, leh Bible Society of Myanmar in hong theihpih khin ta hi. India kumpi in Mizogam sunga Zomite hong ciamtehna ‘Paite Tribe” kicipen India mi i hihna ciaptehna khat ahi hi. Manipur gam college ah Paite pau pen laisim bu (subject) khat in kisaang ta a, Evan. Lang Do Khup laibu bawl ‘Hauhna leh Khansauna Thusim” kici pen B.A. Final Yearte ‘Paite Vernacular’textbook in kizang hi. “Kawlgam laan (Flag) sunga aksi tuangte laka khat pen ei ‘Chin” minam ciamtehna hi.” aci uh hi. “Kawlgam sunga Teachers Traning Institute khat ah Chin State sunga paute khat sin ding lak panin, Tedim pau kiteelkhia hi.” cih thu zong ka za hi. “Kawl kumpi in Zangkong ah khanglui vante kepcingna (museum) bawl a, Chin State sunga minamte lak paninTedim minamte khanglui vante kem hi, cih mi gan ka za hi. Gam khat peuhpeuhah a sin nuamte zat theih dingin Zolai Matric level in bawl kisam a, Standard (Class) V dong kibawl zo ta hi. Norway gama Zomite in i Zolai sin nuamin hong kan thu uh zong ka za ngei hi.

I minam sunga a pil a siamte, leh gam khantoah a teeng i Zoimipihte in i Zo ngeina, i Zolai leh Zo pau zumpih loin, Pasian baikna in zang tek ta uh hi. I pau leh i lai beimang nawn sam ding hiam?

Nang tuin, Kuate lakah? Kuate’ pau tawh?? Pasian na bia hiam???

Rev. Suan Khan Thang
Mizoram